Դատարանն ապրիլի 14-ին կհրապարակի Լևոն Հայրապետյանի նկատմամբ դատավճիռը

Մոսկվայի Զամոսկվորեչյան դատարանն ապրիլի 14-ին կհրապարակի ձեռնարկատեր Լևոն Հայրապետյանի նկատմամբ դատավճիռը, որը մեղադրվում է 700 հազար դոլար գումարի խարդախության մեջ: Այդ մասին, ինչպես տեղեկացնում է «Արմենպրես»-ը, դատարանի դահլիճից հայտնել է ՏԱՍՍ-ի թղթակիցը:

«Դատարանն ապրիլի 14-ին կհրապարակի այդ գործով դատավճիռը»,- ասել է դատավորը:

Ապրիլի 12-ին ավելի վաղ կողմերի դատական վիճաբանությունների ընթացքում դատախազը խնդրել է Հայրապետյանի նկատմամբ պատիժ նշանակել ընդհանուր ռեժիմի գաղութում յոթ տարվա ազատազրկման տեսքով, ինչպես նաև նրանից 20,8 մլն ռուբլի գանձել հօգուտ տուժածների:

Լևոն Հայրապետյանը մեղադրվում է ՌԴ Քրեական օրենսգրքի 159 հոդվածի չորրորդ մասով («Խարդախություն»): Հետաքննության վարկածով՝ նա փաստաբան Սերգեյ Անտոնովի հետ համատեղ Բաշկիրիայից նախկին սենատոր Իգոր Իզմեստևի մորից 700 հազար դոլար է վերցրել նրա որդու նկատմամբ դատավճռի մեղմացմանը աջակցելու համար: Սակայն նա դատավճռի վրա իրապես ազդել չէր կարող:

Իզմեստևը ցմահ բանտարկության է դատապարտվել մի շարք առանձնապես ծանր հանցագործությունների համար:

Հայրապետյանն իր մեղքը չի ընդունում:

Հայրապետյանը ձերբակալվել է 2014 թվականի հուլիսին Իզմեստևի խոստովանական ցուցմունքներից հետո: Բիզնեսմենը մեղադրվում է նաև Բաշկիրիայի ջերմաէներգետիկական համալիրի ձեռնարկությունների գույքի լեգալացման գործով, որն ստացվել է հանցավոր ճանապարհով: