Հունաստանից գրքի մեջ պատրաստված թաքստոցի միջոցով 10 000 եվրո կեղծ թղթադրամներ են բերվել Հայաստան

Եթե թղթադրամների կեղծ լինելու հանգամանքը չբացահայտվեր, ապա արտերկրից, ամենայն հավանականությամբ, կբերվեին ու Հայաստանում կիրացվեին կեղծ թղթադրամների նոր խմբաքանակներ: Քրեական գործի նախաքննությամբ պարզվել է, որ 2015 թվականի մարտի 24-ին քաղաքացի Հակոբ Մախուլյանը Հունաստանից, ոմն Վովայից, իրացնելու նպատակով, գրքի մեջ պատրաստված թաքստոցի միջոցով ստացել է առանձնապես խոշոր չափերի՝ 20 հատ 500 եվրո անվանական արժեքով (ընդհանուրը՝ 10 000 եվրո) կեղծ թղթադրամներ: Գիրքն այլ ապրանքների հետ միասին ՀՀ է հասցվել բեռնափոխադրումներ իրականացնող DHL կազմակերպության միջոցով:

Ըստ մեղադրական եզրակացության՝ Գոռ Խանեսյանը հանցավոր դիտավորությունն ավարտին հասցնելու նպատակով՝ թղթադրամներն իրացնելու համար, Հ. Մախուլյանից ստացել է 18 հատ 500 եվրո անվանական արժեքով կեղծ թղթադրամներ և դրանցից 15 հատը 2015թ. մարտի 25-ին, 1 հատը 2015թ. մարտի 27-ին, 1 հատը 2015թ. մարտի 31-ին «Ակբա կրեդիտ ագրիկոլ բանկ» ՓԲԸ-ի «Արաքս» մասնաճյուղում իրացնելու եղանակով դրել է շրջանառության մեջ:

Բացի վերը նշվածից, Գ. Խանեսյանը, համաձայն քր. գործի նյութերի, 2014թ. աշնանը, առանց իրացնելու նպատակի, Արարատ քաղաքի երկաթգծի հարևանությամբ գտնվող տարածքից ձեռք է բերել և ինքն իրեն աճած կանեփ բույսից ապօրինի պատրաստել ու իր գրպանում պահել զգալի չափերի չորացված «մարիխուանա» տեսակի թմրամիջոց, որը 2014թ. նոյեմբերի 29-ին անձնական խուզարկությամբ հայտնաբերվել և առգրավվել է վերջինիս տաբատի ետևի գրպանից:

Վերը նշված արարքների համար Հակոբ Մախուլյանին և Գոռ Խանեսյանին մեղադրանք է առաջադրվել ՀՀ քրեական օրենսգրքի 202-րդ հոդվածի («Կեղծ փողեր կամ արժեթղթեր պատրաստելը, պահելը կամ իրացնելը») 3-րդ մասի 2-րդ կետի, վերջինիս նաև 268-րդ հոդվածի («Թմրամիջոցների կամ հոգեմետ (հոգեներգործուն) նյութերի ապօրինի շրջանառությունն առանց իրացնելու նպատակի») 1-ին մասի հատկանիշներով, երկուսի նկատմամբ էլ որպես խափանման միջոց կիրառվել է կալանքը: