Դատում են «Առ Արտ» ընկերության տնօրենին

Քրեական գործի նախաքննությամբ պարզվել է, որ շինարարական աշխատանքների իրականացմամբ զբաղվող «Առ Արտ» ՍՊԸ տնօրեն և տեխնիկական անվտանգության պատասխանատու Հովհաննես Հովհաննիսյանը որպես գործատու կրել է ընկերության աշխատակիցներին անվտանգ և նորմալ աշխատանքային պայմաններով ապահովելու պարտավորություն: Սակայն, չնայած այդ հանգամանքին, նա, ըստ մեղադրական եզրակացության, խախտել է տեխնիկայի անվտանգության և աշխատանքի պաշտպանության կանոնները:

Քր. գործի նյութերի համաձայն, թույլ տրված խախտման հետևանքով նույն ընկերության աշխատակից Հրաչյա Նալբանդյանը Երևանի Բուզանդի փողոցի 97/2 հասցեում գտնվող կիսակառույց շենքի մոտ տեղադրված ինքնաշեն ամբարձիչի հետ միասին վայր է ընկել շենքի 13-րդ հարկից' ստանալով առողջությանը ծանր վնաս պատճառած, կյանքին վտանգ սպառնացող մարմնական վնասվածքներ:
Վերը նշված արարքի համար Հովհաննես Հովհաննիսյանին մեղադրանք է առաջադրվել ՀՀ քրեական օրենսգրքի 157-րդ հոդվածի («Աշխատանքի պաշտպանության կանոնները խախտելը») 1-ին մասի հատկանիշով: Մեղադրանքի հաստատման դեպքում Հ. Հովհաննիսյանին սպասվող առավելագույն պատիժն ազատազրկումն է երկու տարի ժամկետով: