Կանխվել է Ֆրանսիայից Հայաստան մաքսանենգ ճանապարհով առաքված առանձնապես խոշոր չափերի թմրամիջոցի իրացումը

Քրեական գործի նախաքննությամբ պարզվել է, որ Երևանի բնակիչ, նախկինում դատված Արամ Նազարյանը գտնվելով Ֆրանսիայում, ընկերոջ՝ Ժորա Ոսկանյանի օժանդակությամբ Հայաստանում առանձնապես խոշոր չափերի «Բուպրենորֆին» տեսակի թմրամիջոց ապօրինի իրացնելու դիտավորությամբ, 2013 թվականի նոյեմբերին Ֆրանսիայում չպարզված հանգամանքներում ձեռք է բերել առանձնապես խոշոր չափերի «Բուպրենորֆին» տեսակի թմրամիջոց պարունակող 300 հատ «Սուբոտեքս» տեսակի դեղահաբ:

Ա. Նազարյանը, ըստ մեղադրական եզրակացության, հիշյալ դեղահաբերից 10 հատը, պայմանավորվածության համաձայն, Ժորա Ոսկանյանին, իսկ մնացածը վերջինիս միջոցով այլ անձի իրացնելու նպատակով, «Ազիզով Վարդուշ» կոչված անձի անունից Ժորա Ոսկանյանի կնոջ մոր՝ Լյուդմիլա Աֆրիկյանի անվամբ Հայաստան առաքվող ծանրոցում եղած մարմնի քսուկի տարաներում քողարկելու եղանակով, մաքսանենգ ճանապարհով, փոստային առաքման միջոցով ուղարկել է Հայաստանի Հանրապետություն:

Համաձայն քր. գործի նյութերի, Ժորա Ոսկանյանը կնոջ՝ Անժելա Իգիթյանի միջոցով 2013թ. նոյեմբերի 27-ին Չարենցավան քաղաքի թիվ 2 փոստային բաժանմունքից ատացել է ծանրոցը, որում առկա առանձնապես խոշոր չափերի վերը նշված քանակության թմրամիջոցը հայտնաբերվել և առգրավվել է ՀՀ ոստիկանության կազմակերպված հանցավորության դեմ պայքարի գլխավոր վարչության աշխատակիցներ կողմից:

Բացի այդ, Ա. Նազարյանը, գտնվելով Ֆրանսիայում, ՀՀ ԱՆ «Արթիկ» քրեակատարողական հիմնարկում պատիժ կրող դատապարտյալ Արման Բեգլարյանին առանձնապես խոշոր չափերի թմրամիջոց ապօրինի իրացնելու դիտավորությամբ, դեռևս չպարզված հանգամանքներում 2014թ. հունվար-փետրվար ամիսների ընթացքում ՀՀ-ում բնակվող իր ծանոթ Արմեն Աղաբաբյանի օժանդակությամբ ապօրինի ձեռք է բերել առանձնապես խոշոր չափերի «Բուպրենորֆին» տեսակի թմրամիջոց պարունակող 45 հատ «Սուբուտեքս» տեսակի դեղահաբ: Այնուհետև, հիշյալ խմբաքանակի թմրամիջոցը Արման Բեգլարյանին իրացնելու նպատակով, 2014թ. փետրվարի 9-ին, ժամը 16-ի սահմաններում Երևանի Նոր Նորքի 7-րդ զանգվածում գտնվող «Կրպակ» սուպերմարկետի մոտ հեռախոսակապով կազմակերպել է Արման Բեգլարյանի կողմից ուղարկված անձ Վարդան Կարապետյանի և Արմեն Աղաբաբյանի հանդիպումը, սակայն թմրամիջոցի փոխանցումը կանխվել է ոստիկանության աշխատակիցների կողմից, Վարդան Կարապետյանն ու Արմեն Աղաբաբյանը բերման են ենթարկվել ոստիկանություն, որտեղ Արմեն Աղաբաբյանի անձնական խուզարկությամբ հայտնաբերվել է առանձնապես խոշոր չափերի «Բուպրենորֆին» տեսակի թմրամիջոց պարունակող 45 հատ «Սուբուտեքս» տեսակի դեղահաբ:

Ավելին՝ Արամ Նազարյանը, գտնվելով Ֆրանսիայում, ՀՀ-ում առանձնապես խոշոր չափերի «Բուպրենորֆին» տեսակի թմրամիջոց պարունակող 45 հատ «Սուբուտեքս» տեսակի դեղահաբ ապօրինի իրացնելու դիտավորությամբ, 2013թ. նոյեմբերի սկզբներին հեռախոսակապի միջոցով պայմանավորվածություն է ձեռք բերել ՀՀ ԱՆ «Սևան» ՔԿՀ-ում պատիժ կրող դատապարտյալ Տիգրան Ղանդիլյանի հետ, ապա, քննությամբ դեռևս չպարզված հանգամանքներում ապօրինի ձեռք է բերել ու Տիգրան Ղանդիլյանին իրացրել առանձնապես խոշոր չափերի «Բուպրենորֆին» տեսակի թմրամիջոց պարունակող 289 հատ «Սուբուտեքս» տեսակի դեղահաբ, որից 46-ը Տիգրան Ղանդիլյանն, իր հերթին, Միքայել Ղանդիլյանի օժանդակությամբ իրացրել է տարբեր անձանց, իսկ մնացած 243 դեղահաբը հայտնաբերվել և առգրավվել է ՀՀ ոստիկանության աշխատակիցների կողմից:

Ֆրանսիայում «Սուբոտեքսի» 300 հաբը ձեռք բերելուց մոտ մեկ տարի հետո, 2014թ. հոկտեմբերի 5-ին Արամ Նազարյանն այդ երկրի իրավապահ մարմինների կողմից վերցվել է նախնական կալանքի, իսկ 2015թ. Սեպտեմբերի 26-ին էքստրադիցիայի ենթարկվել ՀՀ:
Վերը նշված արարքների համար Արամ Նազարյանին մեղադրանք է առաջադրվել ՀՀ քրեական օրենսգրքի 266-րդ հոդվածի («Թմրամիջոցների, հոգեմետ (հոգեներգործուն) նյութերի և դրանց պրեկուրսորների ապօրինի շրջանառությունն իրացնելու կամ պատրաստելու նպատակով կամ դրանց ապօրինի իրացնելը») 3-րդ մասի 2-րդ կետի և 215-րդ հոդվածի («Մաքսանենգությունը») 2-րդ մասի հատկանիշներով, որպես խափանման միջոց ընտրվել է կալանքը: