Գրեթե կասկած չունենք, որ դատարանը, ինչպես նախաքննության մարմինը, չի պարզի ընտրակեղծարարության դրդապատճառը

Քրեական գործի նախաքննությամբ պարզվել է, որ Երևանի Շևչենկո փողոցի թիվ 34/1 հասցեում գտնվող թիվ 8/31 ընտրական տեղամասի հանձնաժողովի նախագահ Վեներա Թորոսյանը ՀՀ Սահմանադրության փոփոխությունների հանրաքվեի ժամանակ' 2015թ. դեկտեմբերի 6-ին, այլ անձանց' Նարեկ Ալեքսանյանի և Վալենտինա Ալեքսանյանի փոխարեն քվեարկելու դիտավորությամբ նշված ընտրատեղամասի ընտրողների ցուցակում վերջիններիս անվան դիմաց լրացրել է պատահական' համապատասխանաբար AG 0516954 և AM 0731339 անձնագրային տվյալները, ապա ստորագրել նրանց փոխարեն:

Ըստ մեղադրական եզրակացության, Վ. Թորոսյանը հիշյալ անձանց փոխարեն ստորագրելուց հետո, կնքել է ընտրողների ցուցակում, որից հետո հանձնաժողովի մյուս անդամներից աննկատ կատարել է քվեարկություն:

Վերը նշված արարքի համար Վեներա Թորոսյանին մեղադրանք է առաջադրվել ՀՀ քրեական օրենսգրքի 153-րդ հոդվածի («Մեկից ավելի անգամ կամ այլ անձի փոխարեն քվեարկելը») հատկանիշով:

Բնականաբար, հարց է առաջանում' Վեներա Թորոսյանն ինչո՞ւ է դիմել ընտրակեղծարարության' այլ անձանց փոխարեն քվեարկել, եթե դա նախագահի կամ պատգամավորի ինչ-որ թեկնածուի օգտին լիներ, չընդունելով հանդերձ, դեռ մի կերպ կարելի էր հասկանալ, բայց այս դեպքում ինչո՞ւ, ի՞նչ շահագրգռությամբ է այդպես վարվել: Այդքան հասկանո՞ւմ էր Սահմանադրության փոփոխություններից ու դրանց մոլեռանդ պաշտպանն էր թեկուզ քրեորեն պատժելի արարք կատարելու միջոցով, թե վերևից էին ասել, որ այդպես վարվեր: Գրեթե կասկած չունենք, որ դատարանն այս հարցը չի պարզի թեկուզ մեղադրանքի հաստատման դեպքում, ինչպես չի պարզել նախաքննության մարմինը: