Ոստիկանի, քննիչի վկայականը կեղծված չի՞ եղել, Տաշչյանի՞նն է եղել, եթե ոչ, ինչո՞ւ մեղադրանք չի առաջադրվել նաև 325-րդ հոդվածով

Որ տղամարդիկ ոստիկան չլինելով, ոստիկանի համազգեստ են ճարել հագել ու կատարել այս կամ այն հանցանքը, քրեական լրահոսում թեկուզ ոչ հաճախակի, բայց նախկինում առանձին դեպքերի ձևով արտահայտվել է: Բայց այս դեպքում, ըստ մեղադրական եզրակացության, այդպիսի արարքի է դիմել կին:

Ինչպես պարզվել է քրեական գործի նախաքննությամբ, Գայանե Տաշչյանը ներկայանալով իբրև ՀՀ ոստիկանության աշխատակից, քննիչ, ՀՀ ոստիկանության համազգեստ կրելով և վկայական օգտագործելով, ինքնակամ յուրացրել է պաշտոնատար անձի կոչումը և իշխանությունը, որը զուգորդվել է դրա հիման վրա հանցանք կատարելով: Թե որոշակի ի՞նչ հանցանք, առայժմ հրապարակված չէ:

Բացի վերոնշյալից, քր. գործի նյութերի համաձայն, Գ. Տաշչյանը 2014թ. ապրիլի 16-ին և 18-ին խարդախությամբ' խաբեությամբ և վստահությունը չարաշահելու եղանակով Ա. Գասպարյանից հափշտակել է առանձնապես խոշոր չափերի գումար' 4 359 000 դրամ: Հավանաբար ոգևորվելով այդ «հաջողությունից» կամ չբավարարվելով ձեռք բերվածով, Գ. Տաշչյանը հուլիսի 30-ին նույն եղանակով քաղ. Ն. Վարդանյանից հափշտակել է 1 015 175 դրամին համարժեք 2500 ամերիկյան դոլար:

Բացի այդ, պարզվել է նաև, որ նա 2013թ. խարդախությամբ Օ. Ամոյանից հափշտակել է 271 251 դրամ:

Ավելին. Գ. Տաշչյանը, դարձյալ քր. գործի նյութերի համաձայն, գիտակցելով, որ իր տրամադրած տեղեկությունները կեղծ են, 2014թ. սեպտեմբերի 9-ին ՀՀ ոստիկանության Էրեբունու բաժնում տված գրավոր հաղորդմամբ, ինչպես նաև վարույթն իրականացնող մարմնին հայտնել է, որ 2014թ. հուլիսի 27-ից մինչև 30-ը ժամանակահատվածում իր ծանոթ Է. Քարիմյանն իր երեխայի սրտի վիրահատության համար և պարտքեր մարելու պատրվակով վերցրել է 2700 ԱՄՆ դոլար գումար' 10 օր հետո վերադարձնելու պայմանով, սակայն խաբել է իրեն և չի վերադարձրել: Այլ կերպ ասած, ինքն է ուրիշին մեղադրել խարդախության' խաբեության և իր վստահությունը չարաշահելու մեջ:

Վերը նշված արարքների համար Գայանե Տաշչյանին մեղադրանք է առաջադրվել ՀՀ քրեական օրենսգրքի 178-րդ հոդվածի («Խարդախությունը») 3-րդ մասի 1-ին կետի, 2-րդ մասի 2-րդ կետի, նույն հոդվածի 1-ին մասի, 333-րդ հոդվածի («Սուտ մատնությունը») 1-ին մասի և 317-րդ հոդվածի («Պաշտոնատար անձի կոչումը կամ իշխանությունն ինքնակամ յուրացնելը») հատկանիշներով: Ուշագրավ է, որ Գ. Տաշչյանին մեղադրանք չի առաջադրվել քր. օր.-ի 325-րդ հոդվածի հատկանիշով, այսինքն' փաստաթուղթ կեղծելու և այդ կեղծված փաստաթուղթն օգտագործելու համար: Այդ դեպքում ի՞նչ է ստացվում' ոստիկանի, քննիչի վկայականը կեղծված չի՞ եղել, նրա՞նն է եղել, Տաշչյանը ոստիկան, քննի՞չ է եղել, եթե այո, ապա ինչ խոսք կարող է լինել պաշտոնատար անձի կոչումը և իշխանությունն ինքնակամ յուրացնելու մասին: