Ընտրակեղծարարություն, որի դրդապատճառը պաշտոնապես դարձյալ պարզված չէ ու դժվար թե պարզվի

Հիմա դատում են ՀՀ Սահմանադրության փոփոխությունների հանրաքվեի ժամանակ ընտրակեղծարարության մեջ մեղադրվող ևս մեկին, սակայն այդպես էլ քննիչը կամ քննիչները չեն պարզել, դատարանն էլ դժվար թե պարզի, թե ինչու է կատարվել ընտրակեղծարարություն' Սահմանադրության փոփոխություններն անցկացնելու համար:

Ինչպես պարզվել է քրեական գործի նախաքննությամբ, Լուսինե Ալեքսանյանը ՀՀ Սահմանադրության փոփոխությունների հանրաքվեի ժամանակ' 2015թ. դեկտեմբերի 6-ին, Երևանի Շևչենկո փողոցի թիվ 34/1 հասցեում գտնվող թիվ 8/31 ընտրական տեղամասում հանդիսանալով հանձնաժողովի անդամ, տեղեկանալով, որ հորեղբոր որդին' Նարեկ Ալեքսանյանը, ցանկանում է այլ անձի' Գերասիմ Ալեքսանյանի փոխարեն քվեարկել, օժանդակել է նրան այդ հարցում:

Բացի այդ, Լ. Ալեքսանյանն իմանալով, որ իր հորեղբոր որդի Արեգ Ալեքսանյանը գտնվում է ՌԴ-ում և քվեարկությանը չի մասնակցելու, վերջինիս անվան դիմաց լրացրել է պատահական անձնագրային տվյալ և ստորագրել, կնքել է ընտրողների ցուցակում, որից հետո հանձնաժողովի մյուս անդամներից աննկատ կատարել է քվեարկություն:

Նույն քր. գործի շրջանակում Նարեկ Ալեքսանյանին մեղադրանք է առաջադրվել այն բանի համար, որ նա ՀՀ սահմանադրության փոփոխությունների հանրաքվեի ժամանակ գալով հիշյալ տեղամաս ու տեսնելով, որ նշված ընտրատեղամասի ընտրողների ցուցակում իր փոխարեն այլ անձ արդեն ստորագրել ու քվեարկել է, զանգահարել է իր հորեղբորը' Գերասիմ Ալեքսանյանին, և տեղեկանալով, որ վերջինս քվեարկության չի մասնակցելու, թիվ 8/31 ընտրական տեղամասի ընտրական հանձնաժողովի անդամ Լուսինե Ալեքսանյանի օժանդակությամբ, քվեարկությանը մասնակցելու համար նշված ընտրատեղամասի ընտրողների ցուցակում ստորագրել է այլ անձի' հորեղբոր (Գերասիմ Ալեքսանյանի) փոխարեն, վերջինիս անվան դիմաց, ստացել է քվեաթերթիկ և կատարել է քվեարկություն:
Վերը նշված արարքների համար Լուսինե Ալեքսանյանին մեղադրանք է առաջադրվել ՀՀ քրեական օրենսգրքի 153-րդ հոդվածի («Մեկից ավելի անգամ կամ այլ անձի փոխարեն քվեարկելը») և 38-153-րդ հոդվածի (մեկից ավելի անգամ կամ այլ անձի փոխարեն քվեարկությանն օժանդակելը»), իսկ Նարեկ Ալեքսանյանին՝ 153-րդ հոդվածի հատկանիշներով: