26 500 դոլարը խարդախությամբ ստացել է դատապարտյալին պատժից պայմանական վաղաժամկետ ազատման հարցը լուծելու պատրվակով

Ռոբերտ Մովսիսյանը մինչ 2010 թվականի օգոստոսի 19-ը զբաղեցրել է ՀՀ ԱՆ քրեակատարողական վարչության օպերատիվ բաժնի գլխավոր մասնագետի, իսկ 2010 թ. օգոստոսի 19-ից հետո նույն վարչության անվտանգության ապահովման բաժնի գլխավոր մասնագետի պաշտոնները: Քրեական գործի նախաքննությամբ պարզվել է, որ նա «Կոշ» ՔԿՀ-ում դատապարտյալ Ն. Թորոսյանին պատժից պայմանական վաղաժամկետ ազատման հարցը լուծելու պատրվակով, վերջինիս ծնողների վստահությունը չարաշահելով, խաբեությամբ մաս-մաս ստացել է 9 492 565 դրամին համարժեք 26 500 ԱՄՆ դոլար և որևէ գործողություն չձեռնարկելով, խարդախությամբ հափշտակել է նշված գումարը:

Վերը նշված արարքի համար Ռոբերտ Մովսիսյանին մեղադրանք է առաջադրվել ՀՀ քրեական օրենսգրքի 178-րդ հոդվածի («Խարդախությունը») 3-րդ մասի 1-ին կետի հատկանիշով: