Մեր իրավապահների աշխատանքից է կախված՝ «Բուպրենորֆինի» սիրահարները կհամոզվե՞ն, որ սխալ ճանապարհ են ընտրել

«Կանխվել է Ֆրանսիայից Հայաստան մաքսանենգ ճանապարհով առաքված առանձնապես խոշոր չափերի թմրամիջոցի իրացումը» վերտառությամբ օրերս հրապարակած տեղեկատվությամբ ԼՈՒՐԵՐ.com-ն անդրադարձավ Ֆրանսիայից Հայաստան առանձնապես խոշոր չափերի թմրամիջոցների առաքման դեպքին: Մեզ հայտնի դարձած նոր տվյալների համաձայն՝ այդ առումով սա միակ դեպքը չէ:

Այս անգամ էլ առանձապես խոշոր չափերի թմրամիջոցի ճանապարհը Ֆրանսիայից Հայաստանն է եղել, տեղափոխման եղանակը նույնպես՝ փոստային առաքման միջոցով, նույնն է նաև թմրամիջոցի տեսակը՝ «Բուպրենորֆին»: Դատելով ամենից, թմրամիջոցների հանցավոր շրջանառությամբ զբաղվողների համար Ֆրանսիայում այս տեսակի թմրամիջոց ձեռք բերելը համեմատաբար դյուրին է, իսկ փոստային առաքման միջոցով այն Հայաստան հասցնելը՝ փորձված ճանապարհ: Հիմա մեր համապատասխան իրավապահ մարմինների աշխատանքից է կախված՝ նորանոր բացահայտումների միջոցով «Բուպրենորֆինի» սիրահարները կհամոզվե՞ն, որ սխալ ճանապարհ են ընտրել:

Քրեական գործի նախաքննությամբ պարզվել է, որ Հայկ Գևորգյանը Ֆրանսիայում բնակվող Կարինե Հակոբյան անուն ազգանվամբ հանդես եկած, քննությամբ դեռևս չպարզված անձի միջոցով կազմակերպել է առանձնապես խոշոր չափերի «Բուպրենորֆին» տեսակի թմրամիջոցը (49 հատ) մաքսանենգությամբ ՀՀ տեղափոխելու փորձը: Ըստ մեղադրական եզրակացության, նա առանց իրացնելու նպատակի, իր իսկ օգտագործման համար փորձել է դրանք ձեռք բերել, ինչն ավարտին չի հասցվել Հ. Գևորգյանի կամքից անկախ հանգամանքներով, քանի հանցագործությունը 2014թ. նոյեմբերի 22-ին բացահայտվել է ՀՀ ԱԱԾ աշխատակիցների կողմից:

Նույն քր. գործի շրջանակում մեղադրանք է առաջադրվել նաև Պետրովս Ազոյանին այն բանի համար, որ նա իր կողմից օգտագործված բջջային հեռախոսահամարով կապ է հաստատել Ֆրանսիայում բնակվող իր ծանոթ, քննությամբ դեռևս չպարզված անձի հետ և տեղեկանալով, որ վերջինս Ֆրանսիայում հնարավորություն ունի ձեռք բերել «Բուպրենորֆին» տեսակի թմրամիջոց, կազմակերպել է առանց իրացնելու նպատակի, իր գործածման համար առանձնապես խոշոր չափերի «Բուպրենորֆին» տեսակի թմրամիջոց հանդիսացող «Սուբոտեքս»-ի 58 ամբողջական, 23 մասնատված դեղահաբեր և 0.25 գրամ քաշով սպիտակ գույնի փոշենման զանգվածն ապօրինի ձեռք բերելու և մաքսանենգությամբ «Հայփոստ» ՓԲԸ միջոցով ՀՀ տարածք տեղափոխելու գործընթացը:

Վերը նշված արարքների համար Հայկ Գևորգյանին մեղադրանք է առաջադրվել ՀՀ քրեական օրենսգրքի 38-215-րդ հոդվածի (մաքսանենգության կազմակերպումը) 3-րդ մասի 2-րդ կետի, 34-268-րդ հոդվածի (առանց իրացնելու նպատակի թմրամիջոցների կամ հոգեմետ (հոգեներգործուն) նյութերի ապօրինի շրջանառության հանցափորձը) 3-րդ մասի, 34-38-268-րդ հոդվածի (առանց իրացնելու նպատակի թմրամիջոցների կամ հոգեմետ (հոգեներգործուն) նյութերի ապօրինի շրջանառության հանցափորձի կազմակերպումը) 3-րդ մասի, իսկ Պետրովս Ազոյանին' 38-215-րդ հոդվածի 3-րդ մասի 2-րդ կետի և 34-268-րդ հոդվածի 3-րդ մասի հատկանիշներով, երկուսի նկատմամբ էլ որպես խափանման միջոց ընտրվել է կալանքը: