Ընդդիմադիր տասը խմբավորումներ պատրաստ են վերսկսելու մարտերը Սիրիայում. AFP

Սիրիական ընդդիմության տասը կազմակերպություններ, այդ թվում՝ «Ահրար աշ Շամ» և «Ջեյշ ալ իսլամ» արմատական իսլամիստական խմբավորումները Սիրիայի կառավարական ուժերին մեղադրել են զինադադարի խախտման մեջ և հայտարարել, որ մտադիր են մարտական գործողություններ սկսել: Այդ մասին, ինչպես տեղեկացնում է «Արմենպրես»-ը, ասված է ապստամբների համատեղ հայտարարության մեջ, որը ներկայացրել է «Ֆրանսպրես» գործակալությունը:

«Ռեժիմի ուժերի կողմից հրադադարի խախտումների թվի ավելացումից հետո մենք հայտարարում ենք միասնական օպերատիվ կենտրոնի ստեղծման և համատեղ մարտական գործողություններ սկսելու մասին»,- խմբավորման հայտարարությունից մեջբերում է արել AFP-ն:

Սիրիական ընդդիմադիր Բանակցությունների բարձրագույն կոմիտեի պատվիրակության ղեկավար Ասադ ազ Զոուբին ապրիլի 17-ին համացանցում զետեղված ուղերձում հորդորել է Սիրիայի զինված ընդդիմությանը՝ «պատասխանել կառավարան ուժերի հարվածներին»:

«Ահրար աշ Շամ» և «Ջեյշ ալ իսլամ» խմբավորումները պաշտոնապես ներառված են սիրիական ընդդիմության կազմակերպությունների թվում, որոնք միացել են հրադադարի ռեժիմին: Սակայն Ռուսաստանի պաշտպանության նախարարության՝ Սիրիայի տարածքում հակամարտող կողմերի հաշտեցման կենտրոնի տվյալներով՝ «Ահրար աշ Շամ»-ը և «Ջեյշ ալ իսլամ»-ը քանիցս խախտել են զինադադարը, հաղորդել է ՏԱՍՍ-ը: