Պուտինի հաջորդ պատերազմը ԼՂ-ում. YNet

Եթե Ուկրաինայում և Սիրիայում միջամտությունից հետո Ռուսաստանը կհամարի, որ դեռևս մեկուսացված է միջազգային ասպարեզում, իսկ տնտեսական ճնշումը չի նվազում, ապա նա կարող է Արևմուտքի դեմ ևս մեկ հակամարտություն կազմակերպել: Օրինակ՝ Լեռնային Ղարաբաղում: Այդ մասին իսրայելական YNet-ում գրում է Վերա Միխալ-Շաֆիրը:

Ղարաբաղյան քառօրյա կատաղի մարտերը ցույց են տալիս «սառեցված» չլուծված հակամարտությունների ամբողջ պրոբլեմատիկան: Ապրիլի 2-ին միջադեպի հետևանքով տասնյակ մարդիկ են զոհվել, և այդ լարվածությունն ամենարյունոտն է դարձել՝ 1994 թ. մարտական գործողությունների դադարեցման ժամանակից ի վեր:

Ռուսաստանի զգուշությունը կապված է միջազգային հարթակում իրավիճակի հետ, որտեղ Մոսկվան վերջերս զգալի առաջընթաց է գրանցել, և ամենայն հավանականությամբ, Լեռնային Ղարաբաղում հակամարտության սրումն այժմ չի բխում իր շահերից: Ռուսաստանը ձգտում է Սիրիայում իր նվաճումները վերածել ԱՄՆ-ի հետ համագործակցության միջոցի՝ «Իսլամական պետություն» ահաբեկչական խմբավորման դեմ պայքարում, և դրանով իսկ վերջ դնել իր միջազգային մեկուսացմանը:

Միևնույն ժամանակ, թերևս ապագայում Ռուսաստանը շահագրգռված կլինի ղարաբաղյան հակամարտության էսկալացիայով: Դա չի կարելի բացառել, եթե Ռուսաստանը իրեն մեկուսացված և ինտենսիվ տնտեսական ճնշման տակ զգա: Հնարավոր է, այս դեպքում, Մոսկվան Արևմուտքի հետ հակամարտության նոր հարթակ կփնտրի: Նման հարթակ կարող է դառնալ Լեռնային Ղարաբաղը՝ շնորհիվ իր աշխարհագրական դիրքի՝ ՆԱՏՕ-ի ծայրամասում: Այս իրավիճակում, Ռուսաստանը կարող է խախտել ուժերի հավասարակշռությունը Հարավային Կովկասում՝ դրանից բխող բոլոր հետևանքներով: