Թուրքիան հրավիրում է Վրաստանին «արտահերթ» մտնել ՆԱՏՕ. «Зеркало недели»

Վրաստանը բավարարում է ՆԱՏՕ-ին անդամակցելու բոլոր պահանջները, և, այդպիսով, կարող է Դաշինքին միանալու հրավեր ստանալ առանց անցնելու դաշինքում անդամակցության գծով Գործողությունների ծրագիրը: Նման կարծիք է հայտնել Թուրքիայի արտաքին գործերի նախարար Մևլութ Չավուշօղլուն: Նա նշել է, որ ՆԱՏՕ-ի 2016 թ. հուլիսին Վարշավայում կայանալիք գագաթնաժողովը պետք է «ընդլայնման գագաթնաժողով» դառնա, հաղորդում է «Зеркало недели»-ն:

«Մենք լիովին աջակցում ենք ՆԱՏՕ-ի կազմի մեջ Վրաստանի մտնելը: Մենք այդ հարցն առաջ ենք քաշում ՆԱՏՕ-ի նախարարների բոլոր հանդիպումների ժամանակ, դրա մասին խոսել ենք երկու տարի առաջ Ուելսի գագաթնաժողովին: ՆԱՏՕ-ի Վարշավայի կայանալիք գագաթնաժողովը պետք է ընդլայնման գագաթնաժողով լինի»,- ասել է Թուրքիայի ԱԳ նախարարը:

Չավուշօղլուն նշել է, որ, ըստ թուրքական կողմի, Վրաստանը «արժանի է լինել ՆԱՏՕ-ին անդամ, քանի որ բավարարում է բոլոր պահանջները»: Դիվանագետը նշել է, որ Թուրքիան այդ հարցը բարձրացնելու է մայիսին՝ առաջիկա հանդիպման ժամանակ:

Միևնույն ժամանակ, նա ընդգծել է, որ չի կարող որևէ երաշխիք տալ Վրաստանին, բայց տեխնիկապես ՆԱՏՕ-ին անդամակցումը՝ առանց անցնելու դաշինքում անդամակցության գծով Գործողությունների ծրագիրը, միանգամայն հնարավոր է: «Վրաստանը կարող է ուղղակիորեն ստանալ հրավերը»,- հայտարարել է Չավուշօղլուն: