Մշակվել է զոհվածների ընտանիքներին հասցեական աջակցության կարգը

ՀՀ վարչապետի հանձնարարականով՝ ղարաբաղա-ադրբեջանական շփման գծում զոհվածների ընտանիքներին հասցեական աջակցություն ցուցաբելու կարգը մշակվել է:

«Այժմ ներքին շրջանառության մեջ է: Դրանով նախատեսվում է զոհվածների ընտանիքներին ներգրավել եկամտաստեղծ գործունեության մեջ: Դա նշանակում է փոքր ու միջին բիզնեսի ծրագրերի շրջանակներում նախ բացահայտել կարիքները, կատարել համապատասխան ուսումնասիրություն և վերապատրաստում տվյալ ընտանիքում՝ ինչ բիզնեսի կամ եկամտաստեղծ գործունեության մեջ կարող են անձինք ներգրավվել և դրան համապատասխան աջակցության սխեմա ներկայացնել: Աջակցության սխեմաները տարբեր են՝ սկսած տեխնիկակական աջակցությունից, օրինակ որևէ բնակավայրում մարդը կարիք ունի գյուղատնտեսական տեխնիկայի, կամ եթե քաղաքաբնակ անձինք են, ապա նրանք կարիք ունեն փոքր մշտական բիզնեսի: Յուրաքանչյուր դեպքի համար նախատեսվում է, որ առանձին կարիքների գնահատում և ծրագիր պետք է լինի»,- կառավարության նիստից հետո լրագրողների հետ զրույցում նշեց ՀՀ էկոնոմիկայի նախարար Արծվիկ Մինասյանը:

Ըստ նրա՝ խոսքը ոչ միայն ապրիլյան դեպքերի, այլ նաև ազատամարտի ընթացքում բոլոր զոհվածների ընտանիքների մասին է:

Նախարարը վստահեցրեց՝ մեխանիզմները, որոնք առաջարկում են, ունենալու են նաև անհրաժեշտ ֆինանսական ապահովվածություն: «Մենք այսօր բյուջեով կիրականացնենք որոշակի ծրագրեր, միաժամանակ բաց կպահենք նաև մասնավոր փոխանցումները, նաև աշխարհասփյուռ հայության փոխանցումները, ժամանակի ընթացքում բոլորին էլ անդրադարձ կլինի»,- ասաց Մինասյանը: