«Ցեղասպանությունը վերապրածները»՝ Նազիկ Արմենակյանի ֆոտոնախագծում. The New York Times

The New York Times պարբերականում հրապարակվել է լուսանկարիչ Նազիկ Արմենակյանի «Ցեղասպանությունը վերապրածները» ֆոտոնախագիծը:

Նազիկ Արմենակյանը վերջին տասնամյակը մահվան հետ հուսահատ մրցավազքի մեջ է անցկացրել, գրում է թերթը: Նա շրջել է Հայաստանով մեկ՝ Հայոց ցեղասպանությունը վերապրածների փնտրելով։ Նա մտադիր է լուսանկարել նրանց և ներկայացնել ու վավերագրել մեկ դար առաջ նրանց հետ տեղի ունեցածը:

«Չնայած նա 45 վերապրածի է գտել, երբեմն հասնում էր հեռավոր գյուղեր՝ միայն իմանալու, որ մահը նրանից առաջ էր հասել...»,- գրում է թերթը։

«Ես շրջվեցի, որ գնամ, բայց հետո կանգնեցի, որովհետև հասկացա, որ անգամ մահվան մեջ ես պետք է լուսանկարեմ նրան»,- ասել է Արմենակյանը:

Թերթը հիշեցնում է, որ հայերը պատրաստվում են այս կիրակի ոգեկոչել Ցեղասպանության զոհերի հիշատակը, և նշում, որ այժմ լուսանկարչի հերոսներից միայն երկուսն են ողջ...

Հոդվածագիրն այնուհետև պատմում է Հայոց ցեղասպանության մասին և նշում, որ Թուրքիան հերքում է բոլոր մեղադրանքները:

«The New York Times-ը լայնորեն լուսաբանել է խնդիրը՝ հայերի դեմ գործողությունները նկարագրելով որպես «համակարգված», «լիազորված» և «իշխանության կողմից կազմակերպված»,- գրում է թերթը։

Հոդվածագիրը գրում է, որ 39-ամյա Արմենակյանը մեծացել է Հայաստանում, երբ այն եղել է խորհրդային իշխանության օրոք, և դպրոցում միայն մի քանի փաստ է իմացել Հայոց ցեղասպանության մասին: Իր լուսանկարների հերոսների մեծ մասը երեխաներ են եղել, որոնք փախել են բռնությունից: Մոտ 70 տարի նրանցից քչերն են խոսել ցեղասպանության մասին, նրանք չէին կարող խոսել Խորհրդային միությունում, այլապես նրանց Սիբիր կուղարկեին...

«Այս մարդիկ ինձ բազմաթիվ անձնական և ծանր հիշողություններ են պատմել իրենց մանկությունից: Ես պատասխանատվություն եմ զգում կառուցել անցյալից ներկա այս կամուրջը և պատասխանատվություն՝ կիսելու այն»,- ասել է Նազիկ Արմենակյանը:

Լուսանկարները՝ այստեղ: