Թուրքիայում ռազմական ենթակառուցվածքներ են ստեղծվելու. Spiegel

«Իսլամական պետություն» ահաբեկչական խմբավորման դեմ պայքարի համար` Գերմանիայի օդուժը ցանկանում է Թուրքիայում տեղակայման ենթակառուցվածքներ ստեղծել: Այդ մասին գրում է Spiegel-ը՝ հղում անելով Գերմանիայի ռազմական գերատեսչության ներքին փաստաթղթերին:

Գերմանացի զինվորականները մտադիր են «Ինջիրլիք» ավիաբազայի տարածքում մշտական տեղակայման համար սեփական ենթակառուցվածքը կառուցել` ներառյալ առկա թռիչքուղու ընդլայնումը, հրամանատարային կետի կառուցումը, զորավարժարանն ու 400 գերմանացի զինծառայողների համար կացարանը:Բազայում պետք է տեղակայվեն Tornado հետախուզական ինքնաթիռներն ու Գերմանիայի օդուժի լիցքավորիչ ինքնաթիռները, պնդում է պարբերականը:

Այդ աշխատանքների կատարման համար նախատեսվում է 65 մլն եվրոյի հատկացում, որոնցից 34 միլիոնը կծախսվի հրամանատարական կետի կառուցման համար, 15 միլիոնը` բնակելի գոտու կառուցման, իսկ 10 միլիոնը` օդանավակայանի տարածքի ընդլայնման համար: Նախատեսվում է աշխատանքներն ավարտել 2017 թվականի ամռանը:

Բացի այդ, բանակցություններ են ընթանում Թուրքիայի տարածքում լրացուցիչ զորակազմ տեղակայելու համար։ Ներկայում Թուրքիայում գտնվում է մոտ 200 գերմանացի զինծառայող:

Գերմանիան «Իսլամական պետության» դեմ միջազգային գործողություններին միացել է 2015 թվականի դեկտեմբերի 4-ից: Բեռլինը տարածաշրջան է ուղարկել 6 Tornado հետախուզական ինքնաթիռ, լիցքավորող ինքնաթիռներ, ինչպես նաև ֆրեգատ` ֆրանսիական «Շառլ դե Գոլ» ականակիր նավին ուղեկցելու համար:

«Ինջիրլիք» ավիաբազան կառուցվել է ԱՄՆ-ի և Թուրքիայի զինուժների համատեղ տեղակայման համար և շահագործման է հանձնվել 1955 թվականին: Ներկայում ավիաբազան օգտագործվում է Սիրիայում իսլամիստ ծայրահեղականների դեմ օդային գործողություն իրականացնելու համար: