Էրդողանին վիրավորել ցանկացողների հերթ է գոյացել Եվրոպայում. Al-Monitor

Թուրքիայի նախագահի այն փորձերը, որոնք ուղղված են թե՛ երկրի ներսում, թե՛ արտերկրում նրան հասցեագրված քննադատությունները կանխելուն, ընդհանրապես չեն հանգեցրել այն արդյունքին, որն ակնկալել է Ռեջեփ Էրդողանը, գրում է Al-Monitor-ը:

Դրա վառ օրինակներից մեկը դարձավ գերմանացի երգիծաբան Յան Բեմերմանի շուրջ ստեղծված իրավիճակը, որը գերմանական ZDF հեռուստաալիքի եթերում «վիրավորական» բանաստեղծություն էր կարդացել Էրդողանի հասցեին: Գերմանական օրենսդրությունում գտնելով հարմարավետ հոդված՝ Թուրքիայի կառավարությունը նոտա հղեց Բեռլինին՝ պահանջելով քրեական հետապնդում սկսել հեռուստահաղորդավարի դեմ՝ Գերմանիայի ՔՕ 103-րդ կետը խախտելու համար («Օտար երկրների ներկայացուցիչներին վիրավորելը»), հիշեցնում է հոդվածի հեղինակը:

Փորձագետները վստահ են, որ Բեմերմանի գործը ցավագին կհարվածի Թուրքիայի նախագահի հեղինակությանը: Դատելով վերջին միտումներից՝ դա արդեն իսկ տեղի է ունենում, գրում է պարբերականը: Այսպիսով, անցյալ շաբաթվա ընթացքում Ջոն Մյուրեյը, որը բրիտանական The Spectator պարբերականի հեղինակներից մեկն է, հայտարարել է Էրդողանի համար «ամենավիրավորական բանաստեղծությունների» մրցույթ: Լրագրողն ընդգծել է, որ խմբագրությունը ստացել է հարյուրավոր պատասխաններ, ընդ որում՝ դրանցից շատերը գրված են եղել արաբերենով:

Պարբերականն ընդգծում է, որ Էրդողանի գործողությունները առաջացրել են բացասական ալիք, և այժմ մարդիկ ու ԶԼՄ-ները ողջ Եվրոպայում հերթ են կանգնում, որպեսզի հանուն խոսքի ազատության վիրավորեն Թուրքիայի նախագահին:

Էրդողանի կողմից մամուլին հալածելը կունենա «հակառակ էֆեկտ», քանի որ եվրոպական երկրները կշտապեն վերացնել այն վիճելի օրենքը, որից օգտվել է Անկարան: Այդպիսով Էրդողանը սեփական կամքի հակառակ կնպաստի Եվրոպայում խոսքի ազատության մակարդակի բարձրացմանը, եզրափակում է հոդվածի հեղինակը: