Ադրբեջանում տասնյակ հազարավոր վահաբիներ կան. իրանական մամուլ

Ադրբեջանում վահաբիզմի տարածման պատճառներին անդրադարձում իրանական AhlulBayt պարբերականը հայտնում է, որ այդ երկրում մուսուլման հավատացյալների 85 տոկոսը (Ադրբեջանի պաշտոնական տվյալներով` 65 տոկոսը) իսլամի շիա ուղղության հետևորդներ են, ինչը, սակայն, խոչընդոտ չէ այն բանին, որ Սաուդյան Արաբիայի, Քուվեյթի, Արաբական Միացյալ էմիրությունների, Եգիպտոսի և որոշ արաբական երկրների ֆինանսական օգնությամբ վահաբիական շարժումն Ադրբեջանում նոր թափ ստանա:

Ինչպես հաղորդում է «Արմենպրես»-ը, «Ով է աջակցում Ադրբեջանում վահաբիական շարժմանը» վերնագրով հոդվածում պարբերականը գրում է, որ մինչև ԽՍՀՄ փլուզումն Ադրբեջանում ոչ մի վահաբիական, որոնք իրենց նաև սալաֆիներ են անվանում (իսլամի սունի ուղղություն), համայնք կամ անգամ խմբավորումներ չեն եղել:

Ըստ պարբերականի՝ Իրանից հետո բնակչության թվաքանակի համեմատ Ադրբեջանը հանդիսանում է երկրորդ ամենամեծ շիա բնակչությամբ երկիրը:

Անդրադառնալով Ադրբեջանում վահաբիական խնդրին, իրանական հրատարակությունը համոզմունք է հայտնում, որ Ադրբեջանում նրանց հիմնականում պաշտպանում է Սաուդյան Արաբիան:

«Ադրբեջանից բազմաթիվ երիտասարդ մարդիկ կրթություն են ստացել Մեդինայի միջազգային իսլամական համալսարանում, որը հանդիսանում է վահաբիական կղերականների և միսիոներների գլխավոր կրթական կենտրոնը: Եվ նրանց մեծամասնությունը ներկայումս ակտիվորեն մասնակցում է կրոնական առաքելություններում՝ առաջ տանելով վահաբիզմն Ադրբեջանում»,- հայտնում է պարբերականը:

Իրանական հրատարակությունը նշում է, որ գործնականում հնարավոր չէ ստույգ տեղեկություն և թվեր ստանալ Ադրբեջանում վահաբիների ֆինանսական դրության մասին, սակայն, դատելով այդ երկրում խոշոր առևտրային կենտրոններում խիտ մորուքավոր և կարճ վարտիքներով մարդկանց մեծ թվաքանակով, կարելի է հստակ ասել, որ վահաբիները որպես Սաուդյան Արաբիայի կողմից Ադրբեջանում ստեղծված բնակչության դաս, նշանակալի ֆինանսական ներուժ ունեն այդ երկրում:

Ենթադրվում է, որ Ադրբեջանում վահաբիները բիզնեսով զբաղվում են ցանցի սկզբունքով:

«Ցանկացած վահաբի, ով արաբական շեյխերից ֆինանսական օգնություն է ստանում, պարտավոր է ստեղծել նոր աշխատատեղեր նաև իր ազգականների համար: Այն ժամանակ, երբ Ադրբեջանում շատերը տառապում են գործազրկությամբ, վահաբիները միակ սոցիալական դասն են այդ երկրում, որոնք զբաղվածության խնդիր չունեն»,- գրում է պարբերականը' ընդգծելով, որ հենց իրենց ֆինանսական հնարավորությունների շնորհիվ է, որ վահաբիները ազդեցություն են գործում ադրբեջանական հասարակության տարբեր հատվածների վրա:

«Տեղեկություններ կան այն մասին, որ վահաբիները կարողացել են մոտեցման ուղիներ գտնել անգամ պետական չինովնիկներին, խորհրդարանի անդամներին և հատկապես՝ մամուլի ակտիվիստներին: Չնայած այն բանին, որ հիշյալ անձինք վահաբիական հայացքներ չունեն, նրանք պաշտպանում են վահաբիական կենտրոնների շահերը (առաջին հերթին' Սաուդյան Արաբիայի):

Ըստ պարբերականի' Ադրբեջանում վահաբիզմն ավելի շատ կենտրոնացած է երկրի հյուսիսային շրջաններում, Սումգայիթում և Բաքվում:

AhlulBayt-ը գրում է, որ տվյալներ կան, որ մինչև 1000 վահաբի մարտիկներ Ադրբեջանից մեկնել են կռվելու Սիրիա, որտեղ նրանք անգամ Ադրբեջանի վահաբիների միություն են ստեղծել:

Անդրադառնալով Ադրբեջանի համար սպառնալիքներին, AhlulBayt-ի վերլուծաբանները նշում են, որ գոյություն ունի սիրիական ճակատամարտերից մեծ թվով ադրբեջանական մարտիկների վերադարձի լուրջ վտանգ:

Ադրբեջանական ԶԼՄ-ներն ավելի վաղ հայտնել են, որ Սիրիայում ներկայումս ահաբեկչական խմբավորումների կազմում 3000-ից ավելի ադրբեջանցի մատիկներ են կռվում, իսկ Սիրիայում ներքին պատերազմի սկզբից մինչ այժմ արդեն 500-ից ավելի ադրբեջանցի մարտիկներ ոչնչացվել են: