Քլինթոնի հաղթանակը կարող է հանգեցնել երրորդ համաշխարհային պատերազմի. Il Giornale

ԱՄՆ նախկին պետքարտուղար Հիլարի Քլինթոնի հաղթանակն ԱՄՆ նախագահական ընտրություններում կարող է հանգեցնել ամենաանկանխատեսելի հետևանքների, այդ թվում՝ երրորդ համաշխարհային պատերազմի: Այս մասին հայտարարել է նրա ինքնակենսագրության հեղինակ Դիանա Ջոնսթոունը Il Giornale-ին տված հարցազրույցում։

Ջոնսթոունը նշում է, որ Քլինթոնը որդեգրել է ագրեսիվ արտաքին քաղաքական կուրս դեռևս պետքարտուղարի պաշտոնում եղած ժամանակ։ Այսպիսով, նա աջակցել է Իրաք ԱՄՆ-ի ներխուժմանը, Լիբիայում պատերազմի մեջ մտնելուն, իսկ հիմա կողմ է Սիրիա ներխուժմանը՝ ընդդեմ երկրի նախագահ Բաշար Ասադի։ Նրա դերը Մերձավոր Արևելքի ապակայունացման մեջ վիթխարի է՝ ասել է նա։

Բացի այդ, Քլինթոնն ունի հակառուսական հայացքներ։ Ինչպես ընդգծում է Ջոնսթոունը, նախկին պետքարտուղարը վստահ է, որ ԱՄՆ-ն հաղթել է «սառը պատերազմը», այդ իսկ պատճառով չի հասկանում, թե ինչպես կարող է Ռուսաստանի նախագահ Վլադիմիր Պուտինը պահանջել «բազմաբևեռ աշխարհ»։

Ջոնսթոունի կարծիքով՝ աշխարհը պետք է վախենա Քլինթոնի ակտիվ գործունեությունից, որի նախընտրական խոստումները տագնապ են առաջացնում։ Նախկին պետքարտուղարը մտադիր է դիվանագիտության փոխարեն կիրառել ռազմական ուժ, կիսել աշխարհը «բարեկամների ու թշնամիների», ինչպես նաև ուժեղացնել ՆԱՏՕ-ն՝ այն աստիճան, որ ցանկացած միջադեպ կարող է հանգեցնել երրորդ համաշխարհային պատերազմի։