Վախից ստիպված եղանք բոլորին սպանել. ադրբեջանցիները` ՌԴ-ում իրականացված ռեզոնանսային սպանության մասին (տեսանյութ)

Ռուսաստանի ներքին գործերի նախարարության Սամարայի շրջանային գլխավոր վարչության շտաբի պետի տեղակալ Անդրեյ Գոշտայի և նրա ընտանիքի սպանության գործով ադրբեջանցիները սպանության առնչությամբ նոր մանրամասներ են ներկայացրել: Այս մասին տեղեկացնում է Vesti.Az-ը՝ հղում անելով «Коммерсант»-ին:

«Մտանք թալանելու, մարդկանց սպանեցինք: Մտածում էինք՝ տանը երկու մարդ կա, սակայն իրականում ավելի շատ էին: Վախից ստիպված եղանք բոլորին սպանել»,- հայտարարել է կասկածյալներից Ռոման Ֆաթալիևը «Ռոսիա 24»-ի եթերում:

Ռոման Ֆաթալիևը հայտարարել է, թե ինքը վերցրել է դրամապանակը, որում 906 ռուբլի է եղել: Բացի այդ, կասկածյալները բանկային քարտեր, բջջային հեռախոսներ, ինչպես նաև Անդրեյ Գոշտայի ծառայողական վկայականն են վերցրել:

Հեռուստաընկերությունը հաղորդում է, որ քննության տվյալներով՝ Ռոման Ֆաթալիևն ու նրա համախոհ Իսլամ Բաբաևը չմիջնորդավորված մասնակցություն են ունեցել հանցագործությանը: Մեկ այլ ձերբակալված՝ Օրհան Զոհրաբովը, սպասել է դռների մոտ:

Իվաշևկա գյուղում զանգվածային սպանության մասին հայտնի էր դարձել ապրիլի 24-ին:

Ոստիկանության պաշտոնյա Անդրեյ Գոշտայի ու նրա հարազատների դիերը հայտնաբերել էր իրավապահի եղբայրը: Ողջ էր մնացել միայն Գոշտայի փոքրիկ բարեկամուհին՝ Սոֆիան: Նրան ծանր վիճակում տեղափոխել են հիվանդանոց։ Աղջկա մոտ կոտրվածքներ են հայտնաբերվել, գլխուղեղային փակ տրավմա, որովայնի բութ վնասվածք. նա կոմայի մեջ է:

Ադրբեջանցիները երկու ամսով կալանավորվել են: Նրանք ինքնախոստովանական ցուցմունք են տվել: