Հովիկ Աբրահամյանի ներշնչման աղբյուրը…

Պարզվում է՝ անգամ 24 ժամից էլ քիչ ժամանակ պահանջվեց, որպեսզի հիմարին էլ պարզ դառնա, թե երեկվա աբրահամյանական հայտարարությունների ներշնչման աղբյուրը որն է եղել: Ինչպես գիտեք, վարչապետ Հովիկ Աբրահամյանը երեկ հանդես էր եկել «աշխարհացունց» հայտարարությամբ, որով փաստացի պատերազմ էր հայտարարել Հայաստանում համատարած բնույթ կրող կոռուպցիային ու մենաշնորհին՝ անգամ կոչ անելով ձգել ամրագոտիներն ու կրճատել ՀՀ փափկասուն չինովնիկներին սպսարկող «պադավատների» քանակը:

Բանից պարզվում է՝ Աբրահամյանի հայրենասիրական զեղման պատճառ հանդիսացել է ոչ թե, ասենք, հայ-ադրբեջանական քառօրյա պատերազմը, այլ Հայաստանում ԵՄ պատվիրակության ղեկավար Պյոտր Սվիտալսկին: Ի՞նչ կապ ունի Սվիտլավսկին հայոց պետականաշինության սուրբ գործի հետ. ուղղակի, և ահա թե ինչու:

Հավանաբար, գիտեք, որ արևմտյան կառույցները մանավանդ վերջին տարիներին, սկսել են ակտիվորեն ներգրավվել Հայաստանում կոռուպցիայի դեմ պայքարի գործում ու այդ նպատակով պարբերաբար ՀՀ կառավարության հաշվեհամարին են փոխանցում բավական կլորիկ գումարներ՝ միլիոնավոր եվրոների ու դոլարների հասնող: Չնայած դրան՝ հաճախ կարելի է լսել Հայաստանում հավատարմագրված եվրաչինովնիկների կողմից հայտարարություններ, որոնցից դատելով՝ հասկանում ես, որ մերոնք՝ տեղի խելոքները, այնքան ճարպիկ են գտնվել ու հնարամիտ, որ հաջողացրել են ոչ միայն յուրացնել սեփական ժողովրդի «աչքերին թոզ փչելու» արատավոր պրակտիկան, այլև՝ եվրոպացիների, վերջիններս էլ, քանի որ ամենևին էլ հիմարներ չեն, վաղուց հասկացել են, որ փողերն իրականում արդյունավետ չեն ծախսվում, իսկ տարիների ընթացքում էլ նույն կաշառակերությունն ու կոռուպցիան Հայաստանում գնալով ոչ թե նվազում, այլ ծաղկում են ապրում. այսօր «Կոնգրես» հյուրանոցում կազմակերպված «Կառավարություն-Քաղաքացիական հասարակություն» հակակոռուպցիոն համաժողովի ժամանակ ՀՀ-ում ԵՄ պատվիրակության ղեկավար Պյոտր Սվիտալսկին, հանդես գալով համապատասխան ելույթով, առանց ավելորդ ձևականությունների ուղղակի հայտարարել է. «Մենք բաց ու անկեղծ ենք կառավարության մեր գործընկերների հետ: Կան պայմաններ, մեզ պետք են կոնկրետ արդյունքներ և եթե չտեսնենք նմանատիպ արդյունքներ, ապա այս 15 միլիոնը չի ծախսվի, չի փոխանցվի Հայաստանի կառավարությանը»:

Միգուցե հիմա ոմանք մտածեն, թե ի՞նչ կապ ունի Սվիտալսկու 15 միլիոնն օր առաջ Հովիկ Աբրահամյանի՝ կոռուպցիայի ու մենաշնորհի դեմ հայտարարած պատերազմի հետ. շատ ուղղակի, քանի որ նման հայտարարությունները, որպես կանոն, հնչում են ստվերային գործընթացներից հետո միայն: Ասել կուզի՝ ամենայն հավանականությամբ՝ երեկվա՝ Հովիկ Աբրահամյանի «դարակազմիկը» հնչել է հենց եվրոպական համապատասխան կառույցների ճնշման արդյունքում՝ նպատակ ունենալով չհիասթափեցնել վերջիններիս ու շարունակել կոռուպցիայի պայքարի անվան տակ համապատասխան միլիոնների ստացումը. համենայն դեպս՝ սա է հուշում վերջին տարիների մեր կառավարության գործելաոճը, գործերի ու խոսքերի համեմատական համադրությունը, որից ստացվող տպավորությունը, ինչպես ինքներդ եք հասկանում, միմիայն բացասական է…

Դավիթ Բաբանով