Հայաստանը «կարմիր գիծ» է քաշում Կովկասում. The National Interest

Արեգ Գալստյանը The National Interest-ում հրապարակված հոդվածում գրում է. 

«Հայկական կողմը հայտարարեց, որ չի վախենում ճանաչել ԼՂՀ-ն և որոշակի հանգամանքների դեպքում վճռականորեն կգնա այդ քայլին: Այսպիսով, Երևանի պաշտոնատար անձինք վերջին 20 տարվա ընթացքում առաջին անգամ դիվանագիտական վերջնագիր են ներկայացնում միջազգային հանրությանը՝ սեփական «կարմիր գիծը» քաշելով ԵԱՀԿ Մինսկի խմբի համար: 

Բազմաթիվ հայ քաղաքական գործիչներ և փորձագետներ նշում են, որ ղարաբաղա-ադրբեջանական հակամարտ զորքերի շփման գծում վերջին բախումները ցուցադրեցին ԵԱՀԿ Մինսկի խմբի համանախագահ երկրների՝ Ֆրանսիայի, Ռուսաստանի եւ Միացյալ Նահանգների միակողմանի և պասիվ վերաբերմունքը:

Երկար ժամանակ Երևանն աչք էր փակում միջնորդների պասիվության վրա և հանդես գալիս ԵԱՀԿ Մինսկի խմբի շրջանակում հակամարտության խաղաղ կարգավորմանը հավատարմության մասին: Այսօր օրավիճակը փոխվել է: Երևանը դժգոհ է այն փաստից, որ միջազգային հանրությունը հստակ քաղաքական գնահատական չտվեց Ադրբեջանի ագրեսիային՝ փոխարենը նախընտրելով բավարարվել երկու կողմերին ուղղված զգուշավոր կոչով:

Հայկական կողմը կարծում է, որ Բաքուն այդպիսի մոտեցումն ընկալում է որպես «կանաչ լույս» հետագա սրացման համար: Այս իրավիճակում Երեւանը պետք է ավելի վճռական քայլեր ձեռնարկի: Դա համառորեն պահանջում են հայ հասարակությունն ու սփյուռքի ազդեցիկ կազմակերպությունները:

Ստեղծված իրավիճակում տարածքային ցանկացած զիջում որպես ազգային դավաճանություն կընկալվի, ինչը կհանգեցնի պետության ղեկից իշխող կուսակցության անխուսափելի հեռացմանը:

Ադրբեջանի պարագայում իրադրությունն այլ է: Նախագահ Իլհամ Ալիևի կլանի համար Ղարաբաղը բացառապես քաղաքական նշանակություն ունի. այն նրան թույլ է տալիս պահպանել իր ռեժիմի ներքին լեգիտիմությունը: Միջազգային տարբեր հարթակներում Իլհամ Ալիևը միշտ ընդգծել է, որ աշխարհում ոչ ոք չի ճանաչել Ղարաբաղի անկախությունը, այդ թվում՝ Հայաստանը: Փաստացի Բաքվի համար կարևոր է ոչ թե Ղարաբաղի տարածքը, այլ Ղարաբաղը որպես Ադրբեջանի մաս ներկայացնելու իրավական հնարավորությունը: Դա դե-ֆակտո կարող էր ձեռնտու լինել հայկական կողմի համար և դե-յուրե բավարարել ադրբեջանական կողմին: Ամեն դեպքում, ապրիլի սկզբին որոշակի շտկումներ արվեցին»: