Նույնիսկ Պուտինի առաջ գլուխ չխոնարհեց. Die Welt-ը՝ Էրդողանի խորամանկությունների մասին

Համաշխարհային Մամուլ 14 Մայիս, 2016 14:34

Թուրքիայի նախագահ Ռեջեփ Թայիփ Էրդողանը խորամանկեց բոլորին: Գերմանիայի կանցլեր Անգելա Մերկելն ամբողջությամբ նրանից է կախված փախստականների հարցում, Եվրամիությանն այլ բան չի մնում, քան Թուրքիայի քաղաքացիների համար չեղարկել վիզային ռեժիմը, նա ինչ-որ չափով նույնիսկ ՌԴ նախագահ Վլադիմիր Պուտինին խորամանկեց՝ գլուխ չխոնարհեց Պուտինի առաջ, ինչպես շատերն են անում, գերմանական Die Welt-ի էջերում գրում են Նանդո Զոմերֆելդտն ու Հոլգեր Ցշեպիցը:

«Թվում է, թե ոչ ոք չի կարող «Եվրոպայի նոր արքայի», ինչպես այժմ նրան անվանում են, դեմն առնել։ Սակայն նրա քաղաքական հաղթական երթի գագաթնակետին հայտնաբերվեց նրա թույլ տեղը՝ նրա երկիրը բավական խոցելի է տնտեսական ոլորտում»,- գրում են հոդվածի հեղինակները։

Եկամուտների «առյուծի բաժինը» զբոսաշրջությանն էր պատկանում, սակայն այժմ այդ «փողաբեր ալիքը չորացել է»։

«Երկրում հաճախակիացած ահաբեկչություններն ու Էրդողանի պահվածքը՝ քաղաքական արկածախնդրի ոճում, բացասաբար են ազդում զբոսաշրջիկներկ հոսքի վրա»,- գրում են լրագրողները։ Արդյունքում՝ մարտին զբոսաշրջիկների թիվը կրճատվել է նախորդ տարվա համեմատ շուրջ 13 տոկոսով։ Պատճառն այն է, որ «Թուրքիային բոյկոտ են հայտարարել» երկրի համար զբոսաշրջային առումով 2 կարևոր երկրները՝ Ռուսաստանն ու Գերմանիան։

Նրանք հիշեցնում են, որ Ռուսաստանի և Թուրքիայի հարաբերությունները կտրուկ վատացել են անցած տարվա նոյեմբերին թուրքական օդուժի կողմից ռուսական Սու-24 ինքնաթիռի կործանումից հետո: Այդ միջադեպից հետո Ռուսաստանը Թուրքիայի նկատմամբ մի շարք պատժամիջոցներ է սահմանել՝ այդ թվում արգելելով մի շարք ապրանքների ներմուծումն նու ռուս զբոսաշրջիկների մեկնումը Թուրքիա։

Թե որքան վատ է Թուրքիայի վիճակն այս հարցում, կարելի է հասկանալ նաև Turkish Airlines ավիաընկերության ներկայացրած տվյալների հետ ծանոթանալով։ Այս շաբաթ ընկերությունը հայտնել է առնվազն 1999 թվականից ի վեր կրած ամենամեծ եռամսյակային կորուստների մասին։

Բացի դա՝ թուրք վարչապետ Ահմեթ Դավութօղլուի անսպասելի հրաժարականը լրջորեն ցնցել է բոսֆորյան շուկաները։ Արդյունքում՝ մայիսին թուրքական լիրան դոլարի նկատմամբ արժեզրկվել է 5.5 տոկոսով, եվրոյի նկատմամբ՝ 5 տոկոսով։

Միևնույն ժամանակ, Թուրքիայի արժութային պահուստները լրջորեն կրճատվել են։ Այդ իսկ պատճառով, դժվար թե Էրդողանը կարող է երկար շարունակել իր մեծ շոուն, գրում են հեղինակները։