«Ալ Քաիդան» որոշել է մշտական հենակետ ստեղծել Սիրիայում. The New York Times

«Ալ Քաիդա» միջազգային ահաբեկչական ցանցի պարագլուխ Այման ազ Զավահիրին որոշել է նոր ճակատ բացել Սիրիայում և նույնիսկ այլընտրական հենարան ձևավորել այնտեղ «Ջեբհաթ ան Նուսրա» խմբավորման օգնությամբ: Այդ մասին, ինչպես տեղեկացնում է «Արմենպրես»-ը, մայիսի 15-ին հաղորդել է The New York Times թերթի էլեկտրոնային տա րբերակը՝ հղում անելով ԱՄՆ-ի և Եվրոպայի երկրների հատուկ ծառայությունների աղբյուրների:

«Ալ Քաիդայի» պարագլուխների մտադրություններն արտացոլում են կազմակերպության համար Սիրիայի կարևորության աճը և նախանշում նրա արյունալի մրցակցության սաստկացումը «Իսլամական պետություն» ահաբեկչական խմբավորման հետ»,- հրատարակությունը մեջբերել է իր զրուցակիցներից մեկի կարծիքը: Նա ուշադրություն է դարձնում այն բանի վրա, որ խոսքը վերաբերում է արմատական տեղաշարժին «Ալ Քաիդայի» և «Ջեբհաթ ան Նուսրայի» դիրքորոշման մեջ, որոնք մինչ այժմ հրաժարվում էին ձեռնամուխ լինել ինքնիշխան «պետության» ձևավորմանը, նախքան նրա համար կստեղծվեն օբյեկտիվ նախադրյալներ:

Հատուկ ծառայությունների գնահատմամբ՝ Սիրիայում մշտական ներկայությունը «անգնահատելի շանս կտա ահաբեկիչներին»: Այդ դեպքում «Ալ Քաիդան» «հարվածի հեռավորության» վրա կգտնվի Եվրոպայից, ինչպես նաև կկարողանա զինյալների ավելի ակտիվ հավաքագրմամբ զբաղվել Իրաքում, Թուրքիայում, Հորդանանում և Լիբանանում: Նման հենակետի պատրաստումն ավարտելու նպատակով այն առավել հուսալի և պատրաստված մարտիկների թվից Սիրիա է ուղարկել տասնյակից ավելի հանձնակատարների, հաղորդել է ՏԱՍՍ-ը: