Զարուհի Փոստանջյան. ԵՏՄ-ին Ադրբեջանի անդամակցության գինն արցախապատկան հողատարածքների հանձնումն է

Ազգային ժողովում քառօրա նիստի ընթացքում քվեարկության դրվեց «Արցախի Հանրապետությունը ճանաչելու մասին»՝ պատգամավորներ Զարուհի Փոստանջյանի և Հրանտ Բագրատյանի հեղինակած օրենքի նախագծի օրակարգ ընդգրկելու հարցը: Նիստի ընթացքում հարցը դրվեց քվեարկության՝ 12 կողմ, 0 ձեռնպահ և 0 դեմ ձայներով որոշումը չընդունվեց:

ԼՈւՐԵՐ.com-ի տեղեկացմամբ՝ ՀՀԿ-ական պատգամավոր Արտակ Զաքարյանն իր խոսքում նշեց, որ ԼՂՀ-ն արդեն կայացած պետություն է, ինչը փաստ է, և որևէ մեկը չի ժխտում: Այնուամենայնիվ, խնդիրը դեռևս գտնվում է իր հասունացման փուլում, և մենք չպետք է անենք միակողմանի քայլեր, որոնք անհարմար վիճակում կդնեն մեզ բոլորիս, մեր բարեկամներին. «Մեր գործընկերներ պետություններին հնարավորություն չեն տա համապատասխան ձևաչափերի կիրառմամբ և խաղաղ կարգավորման լիարժեք տրամաբանության հիմքում բոլորին մասնակից դարձնել Արցախի անկախության ճանաչման գործընթացին»,- ասաց նա: 

ԲՀԿ-ական պատգամավոր Նաիրա Զոհրաբյանի կարծիքով՝ հարցը նուրբ և զգայուն է, և հայրենասիրության մրցավազքի խնդիր դրված չէ.

«Պետք է վստահ լինենք, որ այսօր ճանաչելով՝ չենք վտանգելու սահմանին կանգնած զինվորին և չենք հրահրելու լայնամասշտաբ դե յուրե պատերազմական գործողություններ, բայց մենք պետք նման քայլ անելուց առաջ առաջնորդվեք նախ «մի՛ վնասիր» տարբերակով»:

«Ժառանգություն» խմբակցությունից պատգամավոր Ռուբիկ Հակոբյանը թեպետ կողմ է նախագծին, բայց կարծում է՝ շահարկման դաշտը մեծ է, և կարծիք հայտնեց, որ հարցին ավելի լուրջ մոտեցում է պետք:

Պատգամավոր Խաչատուր Քոքոբելյանի կարծիքով՝ այստեղ հայրենասիրության հարց չկա, և չարժե սրեր ճոճել ու ասել՝ հարցը հասունանում է կամ վտանգավոր է և այլն: «Ես չեմ կարծում, որ դահլիճում կա մարդ, ով կողմ չէ այս նախագծին: Ուղղակի խնդրում եմ իմ գործընկերներին հնարավորություն ստեղծել՝ մեր Ազգային ժողովում այս հարցը չքննարկվի, զուտ հաշվի առնելով շահարկումները մեր լավը չցանկացողների կողմից»:

ՀՅԴ-ական Արմեն Ռուստամյանն էլ ասաց, որ իրենք միշտ հիմնավորել են իրենց «կողմ» քվեարկելը: «Մենք բոլոր այս նախաձեռնություններին միշտ կողմ ենք քվեարկել՝ ասելով, որ երբեք չենք կարող դեմ լինել Ղարաբաղի ճանաչմանը, բայց դա պետք է միասնական լինի, միակողմանի չպետք է լինի: Բանակցողները հստակ պետք է ասեն, թե երբ է կատարելու պահը: Սա մեր զինանոցում պետք է միշտ ունենանք, և այն միջանկյալ քայլը, որը կարող է դրա լուծումներն ապահովել, Ղարաբաղի հետ դաշինք կնքելն է: Համարում ենք, որ այդ հարցը հրատապ պետք է բերվի օրակարգ»,- ասաց նա:

Օրինագծի համահեղինակ Զարուհի Փոստանջյանն ասաց, որ լայնածավալ պատերազմական գործողությունները տեղի են ունենում: Այս պահին արցախա-ադրբեջանական սահմանին տեղի են ունենում լայնածավալ ինժեներական աշխատանքներ: «Պատերազմը մեր դուռը թակել է, և մենք պատերազմի մեջ ենք: Իրավիճակն իրապես փոխված է. այն, որ մենք ճանաչենք կամ չճանաչենք, դրանով որևիցե կերպ պատերազմական գործողությունները չեն կանխվելու: Կարող էին կանխվել, եթե չմտնեինք ԵՏՄ: Այս պահին դրված է ԵՏՄ-ին Ադրբեջանի անդամակցությունը, և դրա գինն արցախապատկան հողատարածքների հանձնումն է»: