Դուք մեր պրոյեկտներում չկաք, հանգիստ եղեք. Շարմազանովը՝ Ուրիխանյանին

Այսօր Ազգային ժողովում Ընտրական օրենսգրքի շուրջ ելույթ ունեցավ պատգամավոր Տիգրան Ուրիխանյանը:

Պատգամավորի խոսքով՝ սև քարոզչությունը, հակազդեցությունը, սուտը, կեղծիքը ու հանցագործությունը կանգնել են իր քաղաքական թիմի առջև, և իրենց դեմ սկսել են պայքարել բացարձակապես քրեական հանցակազմ պարունակող մեթոդներով:

ԼՈւՐԵՐ.com-ի թղթակցի տեղեկացմամբ՝ ըստ պատգամավորի՝ կա մի երևույթ, որն ընտրություններին նախորդող ժամանակաշրջանում, ընթացքում և հետո ձևավորում է օրենսդիր և գործադիր իշխանությունը Հայաստանում՝ հետապնդելով նպատակ ֆինանսական, փողային, լծակային ազդեցությունները վերաբաշխելով՝ ներգրավել բոլոր նրանց, ովքեր իշխանական համակարգում կամ իշխանական համակարգին մերձ համարվում են «մերոնք», «մերոնքական», ովքեր ապահովում են փող, պաշտոնից բխող ազդեցություն և ապահովում են ձայներ՝ սա է, ըստ նրա, ընտրական համակարգը:

«Տիգրան Ուրիխանյանն ու «Ալյանս» առաջադիմական-ցենտրիստական կուսակցությունն իշխանական պլանավորված, ծրագրավորված, եկող խորհրդարանին ընտրությունների ձևով տանող ճանապարհային քարտեզի մեջ չկա, բայց վերևն Աստված, մեզանում՝ արդարություն»,- ասաց Ուրիխանյանը:

Պատգամավորն իր խոսքում անդրադարձավ իր կողմից կառուցած առանձնատան մասին լուրերին: Նա պարզաբանեց, թե որտեղից են իր միջոցները, որ կարողանում է առանձնատուն կառուցել. «Ո՛չ ձեր հոր գրպանից, ո՛չ էլ ձեր կողմից պատվիրված, նախկինում պատգամավոր աշխատած ճիվաղների գրպանից, այլ վարկերից, աշխատավարձից, օրենքով սահմանված այլ միջոցներից: Գողը չէ, որ իրավունք ունի իմ մասին խոսելու և քննարկելու, թե որտեղից իմ ունեցվածքը: Հանցագործը չէ, որ պետք է քննադատի «Հրազդան Ցեմենտի» աշխատակիցների աշխատատեղերը պահպանելու՝ իմ մտահոգությունը՝ կապելով իբրև թե ՎՏԲ-ի հետ, Ադրբեջանի հետ: ՎՏԲ-ն էլ ձեր գլխին, Ադրբեջանն էլ ձեր գլխին, ձեր մութ ու կեղտոտ գործարքներն էլ ձեր գլխին, «Հրազդան-Ցեմենտն» էլ ձեզ»,- ասաց նա: 

Տիգրան Ուրիխանյանի ելույթից հետո Շարմազանովը ճշտեց, թե Ուրիխանյանը կո՞ղմ է ի վերջո ԸՕ-ին, թե՞ ոչ, վերջինս պատասխանեց. «Իհարկե դեմ եմ»:

Շարմազոնովը դիմելով Ուրիխանյանին՝ ասաց, որ որևէ պատգամավոր կարիք չունի խորհրդարանում պաշտպանական ճառ ասելու քանի որ պատգամավորը ժողովրդի ընտրյալն է. «Ես՝ որպես իշխանություն և որպես ձեր գործընկեր կարող եմ ասել՝ Դուք մեր պրոյեկտներում չկաք, հանգիստ եղեք»: