Մոսկվան և Եվրամիությունը չլուծվող հակասություններ չունեն. Պուտինի հոդվածը

ՌԴ նախագահ Վլադիմիր Պուտինը կոչ է արել տնտեսական և հումանիտար համագործակցության գոտի ստեղծել Ատլանտիկայից մինչև Խաղաղ օվկինոս ընկած տարածքում: Ռուսաստանի ղեկավարը նշել է, որ այդ ճանապարհին կարևոր քայլ պետք է դառնա «եվրոպական և եվրասիական ինտեգրացիոն գործընթացների ներդաշնակեցումը», տեղեկացնում է «Արմենպրես»-ը:

Պուտինի խոսքով՝ այդ աշխատանքը հատկապես պահանջված է արդի պայմաններում, երբ Եվրոպան աճող մրցակցության է հանդիպում ազդեցության մյուս կենտրոնների կողմից:

«Ակնհայտ է, որ նոր միջազգային իրողություններում «հին աշխարհամասի համար» կարելի է արժանի տեղ ապահովել միայն միավորելով բոլոր եվրոպական երկրների, այդ թվում նաև Ռուսաստանի ներուժը»,- նշել է Պուտինը հունական «Կատիմերինի» թերթում հրապարակված՝ իր հոդվածում:

Ռուսաստանի ղեկավարը նաև նշել է, որ Մոսկվան և Եվրամիությունը չլուծվող հակասություններ չունեն:

«Բազմապլան գործընկերության ուղի վերադառնալու համար անհրաժեշտ է սոսկ հրաժարվել «մեկ դարպասով խաղի» արատավոր տրամաբանությունից, իրապես հաշվի առնել միմյանց կարծիքն ու շահերը»,- ասված է նախագահի հոդվածում:

Պուտինը հավելել է, որ առայժմ Եվրոպայի կողմից Ռուսաստանի հետ երկխոսության պատրաստակամություն չի երևում:

Ռուսաստանի նախագահի հոդվածը հրապարակվել է Հունաստան նրա կատարելիք պաշտոնական այցի նախօրյակին, որը նախատեսված է մայիսի 27-28-ը, հաղորդել է ՌԻԱ Նովոստի գործակալությունը: