Եգիպտական կործանված օդանավի ինքնագրիչները ծովի հատակից դուրս կբերեն 10 օրից ոչ շուտ. Monde

EgyptAir ավիաընկերության A320 կործանված ինքնաթիռի սև արկղերը ծովի հատակից դուրս բերելը հնարավոր կդառնա 10 օրից ոչ շուտ: ֆրանսիական Deep Ocean Search (DOS) ընկերության նավը, որն իրականացնելու է որոնումները, արդեն հասել է օդանավի կործանման ենթադրյալ վայր, տեղեկացնում է «Արմենպրես»-ը՝ հղում անելով Monde թերթ-ին:

Ավելի վաղ հաղորդվել էր, որ Եգիպտոսը և Ֆրանսիան համաձայնություն են կնքել երկու ընկերությունների հետ, որոնք մասնագիտացած են խորջրյա որոնումների բնագավառում: Խոսքը Alseamar և DOS ընկերությունների մասին է: Ծավալված որոնողական գործողություններում նաև գործի են դրվել Եգիպտոսի, Հունաստանի, Ֆրանսիայի և ԱՄՆ-ի ռազմաօդային ու ռազմածովային ուժերը:

«Alseamar և DOS ընկերությունները լրացնող դեր են խաղում: Նախ՝ հարկավոր է, որ նրանք հայտնաբերեն սև արկղերի ազդանշանները և հետո իջնեն ջրի հատակ ու բարձրացնեն ինքնագրիչները»,- հրատարակությունը մեջբերում է հետաքննությանը մոտ կանգնած աղբյուրի խոսքը:

Նույն այդ աղբյուրը նշել է, որ DOS նավը մայիսի 28-ին դուրս է եկել Իռլանդական ծովից և ուղղություն վերցրել ինքնաթիռի կործանման ենթադրյալ գոտի: «Այն պետք է տեղ հասնի դուրս գալուց 12 օր հետո»,- հրատարակությանն ասել է զրուցակիցը, հավելելով, որ նավը պետք է եգիպտացի և ֆրանսիացի քննիչների վերցնի Ալեքսանդրիայից:

Միաժամանակ կործանման ենթադրյալ վայր է ուղևորվում Ֆրանսիայի ռազմածովային ուժերի Laplace նավը, որի վրա գտնվում են DETECTOR-6000 ընդջրյա երեք համակարգեր, որոնք մշակվել են ֆրանսիական Alseamar ընկերության կողմից, որը մասնագիտանում է խորջրյա գործողությունների բնագավառում: Այս սարքավորումը ինքնաթիռի ինքնագրիչներից ելնող ազդանշանը կարող է գրանցել մինչև հինգ կիլոմետր տարածության վրա: Մասնագետների գնահատումներով՝ որոնման գոտու խորությունը կազմում է շուրջ երեք կիլոմետր:

Սև արկղերը, որոնք գտնվում են ինքնաթիռում, ազդանշան են հաղորդում, ինչի շնորհիվ կարելի է որոշել դրանց գտնվելու վայրը: Ազդանշանի հաղորդումը դադարում է կործանման պահից 30 օր հետո: Այս մասին գրում է ՌԻԱ Նովոստին: