ՊԵԿ-ի պարզաբանումը «ԼՈՒՐԵՐ.com»-ի հրապարակման վերաբերյալ

«Ի պատասխան «ԼՈՒՐԵՐ.com» կայքում հրապարակված հոդվածի, ՀՀ ԿԱ պետական եկամուտների կոմիտեն անհրաժեշտ է համարում հանդես գալ պարզաբանմամբ:

Հրապարակման մեջ նկարագրվում է, որ «Ագրոֆիրմա Սևան» ՍՊԸ տնօրեն Աշոտ Մնացականյանը ցանկացել է ներմուծել գիտական աշխատանքներում օգտագործվող 3 կգ քաշով սարք և դրա մասը, որը նա ձեռք է բերել համացանցով՝ վճարելով 120 ԱՄՆ դոլար: Ա.Մնացականյանի ներկայացմամբ, տեսնելով սարքի փաստաթղթերը, մաքսային միջնորդը (բրոքեր) հայտնել է, որ այն հին է և անհրաժեշտ է որոշել դրա շուկայական արժեքը, ինչին Ա.Մնացականյանը համաձայնել է: Ներկայացված բովանդակությունից ակնհայտ է դառնում, որ «Ագրոֆիրմա Սևան» ՍՊԸ տնօրեն Աշոտ Մնացականյանը սահմանափակվել է մաքսային ներկայացուցչի հետ իր շփումներով և բոլոր տեղեկությունները, որոնք նշված են պարբերության մեջ, քաղաքացուն տրամադրվել են մաքսային ներկայացուցչի կողմից, որը, ինչպես պարզվել է հետագայում, եղել է «Գարանտ բրոքերս» ՍՊԸ-ի աշխատակից Հովհաննես Հովհաննիսյանը: Հարկ է շեշտել, որ «Գարանտ բրոքերս» ՍՊԸ-ն հանդիսանում է մաքսային միջնորդական ծառայություններ մատուցող մասնավոր ընկերություն: Բնականաբար ՊԵԿ-ը, որպես պետական կառույց, չի կարող և չպետք է պատասխանատվություն կրի մասնավոր ընկերության աշխատակցի գործողությունների կամ անգործության համար: Կատարված ուսումնասիրության արդյունքում պարզվել է, որ քաղաքացի Աշոտ Մնացականյանն իր առջև ծառացած որևէ խնդրի կապակցությամբ չի դիմել տվյալ պարագայում ներմուծվող ապրանքների մաքսային ձևակերպումներ կատարող ստորաբաժանման՝ ՀՀ ԿԱ ՊԵԿ միջազգային փոստային և սուրհանդակային առաքումներով փոխադրվող ապրանքների մասնագիտացված մաքսատան որևէ պաշտոնատար անձի:

Հրապարակման մեջ շոշափվում է, որ համաձայն ՄՄ մաքսային օրենսգրքի 102-րդ հոդվածի 1-ին մասի՝ մաքսային հսկողության իրականացման հարցում օժանդակության տրամադրման նպատակով մաքսային մարմիններն իրավունք ունեն մասնագետներ և փորձագետներ ներգրավել պետական այլ մարմիններից: Այս առնչությամբ հայտնում ենք, որ սույն հոդվածի դրույթը կոչված է ծառայելու հատկապես այն դեպքերում, երբ մաքսային մարմնի պաշտոնատար անձը, որը չի կարող և չպետք է նեղ մասնագիտական գիտելիքներ ունենա բացառապես բոլոր ոլորտներում և բոլոր ապրանքների մասով, դիմի կոնկրետ դեպքում առաջադրված խնդիրների լուծման համար անհրաժեշտ գիտելիքների և տեղեկատվության տիրապետող մասնագետի, ինչն էլ իրականացվել է: Կարևոր է նաև այն հանգամանքը, որ փորձագետին ներգրավելու վերաբերյալ որոշումը կայացվել է հատկապես «Ագրոֆիրմա Սևան» ՍՊԸ տնօրեն Աշոտ Մնացականյանի՝ 04.03.16թ. թիվ Մ-3011 դիմումի հիման վրա և այդ դիմումի ընթացքն ապահովելու համար: ՀՀ ԿԱ ՊԵԿ նախագահի՝ 18.03.2011թ. թիվ 112101-11 հանձնարարականի համաձայն՝ վստահաբար կարելի է ենթադրել, որ քաղաքացի Աշոտ Մնացականյանի կողմից միջազգային փոստային և սուրհանդակային առաքումներով փոխադրվող ապրանքների մասնագիտացված մաքսատան պաշտոնատար որևէ անձի՝ վերադաս մաքսային մարմնին դիմում ներկայացնելու մասին ցանկություն հայտնելու դեպքում, տվյալ դիմումը կընդունվեր անմիջապես և էլեկտրոնային կապուղիներով կառաքվեր ըստ նշանակության:

Աշոտ Մնացականյանը դժգոհում է, որ մարտի 4-ին, մտնելով ՀՀ ֆինանսների նախարարության առաջին հարկ, ցանկացել է ներկրված ապրանքը գնահատելու դիմում գրել, ինչին ի պատասխան, ՖՆ աշխատակիցներից մեկն առաջարկել է դիմումը լրացնել դիմացի գրախանութում: Ա.Մնացականյանի պնդմամբ, դիմումը լրացնելու համար ինքը գրախանութում սպասել է 30 րոպե՝ վճարելով 1000 դրամ: Ա.Մնացականյանը դժգոհում է ֆինանսների նախարարությունում դիմում գրելու համար անհրաժեշտ պայմանների բացակայությունից: Հրապարակման այդ մասի առնչությամբ, նշենք, որ ՀՀ ԿԱ ՊԵԿ վարչական շենքում, քաղաքացիների համար հասանելի ազատ մուտքով ստեղծված է ժամանակակից բոլոր պահանջներին բավարարող սպասարկման կենտրոն, որտեղ ստեղծված են դիմումներ գրելու և ներկայացնելու համար բոլոր անհրաժեշտ պայմանները: Անկասկած, դիմում գրելու ցանկություն հայտնելու պարագայում, յուրաքանչյուր քաղաքացու կտրամադրվեր այդ նպատակով անհրաժեշտ բոլոր միջոցները: Պետք է հաշվի առնել այն իրողությունը, որ ՊԵԿ սպասարկման կենտրոնի աշխատակիցները լիազորված չեն և չեն էլ կարող դիմումատուներին խորհրդատվություն մատուցել ներկայացվելիք դիմումների բովանդակության վերաբերյալ: Այն դեպքերում, երբ դիմումատուն չի ուզում կամ չի կարող ինքնուրույն շարադրել դիմումի բովանդակությունը, նրանց խորհուրդ է տրվում դիմել նմանատիպ ծառայություններ մատուցող մասնավոր ընկերությունների, ինչն էլ արվել է նկարագրված դեպքում:

Ա.Մնացականյանի խոսքով, նախարարության աշխատակիցը հայտնել է, որ առկա կարգի համաձայն, դիմումն անհրաժեշտ է հանձնել հասցեատերերին: Հարկ է նշել, որ ներկայացված շեշտադրումները նույնպես որոշակիորեն աղավաղված են և չեն համապատասխանում իրականությանը. սպասարկման կենտրոնի աշխատակիցների կողմից դիմումատուներին (գլխավորապես հենց նրանց խնդրանքով) հաճախ հնարավորություն է ընձեռվում ընտրություն կատարել այլ մարմիններին հասցեագրված գրություններն անձամբ հասցեատիրոջը հասցնելու կամ փոստային ու սուրհանդակային ծառայության միջոցով առաքելու տարբերակների միջև, ինչն արվում է դարձյալ դիմումատուի ժամանակը խնայելու նկատառումից ելնելով: «Ագրոֆիրմա Սևան» ՍՊԸ տնօրենի խոսքով, ինքը հետևել է աշխատակցի խորհրդին և ուղևորվել արդարադատության նախարարության փորձագիտական կենտրոն: Հրապարակման այդ հատվածում ներկայացված քննադատությունն ընդունելի է մասամբ, մասնավորապես կենտրոնի հասցեն նշված չլինելու մասով, ինչի կապակցությամբ կարվեն համապատասխան հետևություններ և կձեռնարկվեն անհրաժեշտ միջոցներ:

Ինչ վերաբերում է արդարադատության նախարարության մասին նշագրում չլինելու վերաբերյալ պնդումին, ապա պետք է հաշվի առնել, որ համաձայն ՀՀ կառավարության էլեկտրոնային ռեգիստրի 07.01.2003թ. թիվ 286.210.04788 գրառման՝ տվյալ մարմնի տառացի անվանումն է «Հայաստանի Հանրապետության փորձագիտական կենտրոն» ՊՈԱԿ: Միաժամանակ հայտնում ենք, որ ՊԵԿ-ի կողմից «Հայաստանի Հանրապետության փորձագիտական կենտրոն» ՊՈԱԿ-ի աշխատակիցների գործողությունների, այդ թվում քաղաքացուն տրված ցուցումների վերաբերյալ պարզաբանումներ տրվել չեն կարող: Ինչ վերաբերում է հրապարակման այն մասին, ըստ որի, ներկրված ապրանքը գնահատելու համար Ա.Մնացականյանին և հրավիրված փորձագետին թույլ չեն տվել մուտք գործել օդանավակայանի պահեստ, հայտնում ենք, որ այս և հաջորդիվ բերված նույնաբովանդակ պարբերությունների, մասնավորապես բեռնային համալիրի տարածք մուտք գործելու, բեռնային համալիրին վճարման ենթակա գումարների, մաքսային ներկայացուցչին կամ փորձագիտական կենտրոնին վճարվելիք գումարների վերաբերյալ ՊԵԿ-ը պարզաբանումներ տալ և պատասխանատվություն կրել չի կարող, քանի որ «Արմենիա միջազգային օդանավակայաններ» ՓԲԸ-ի բեռնային համալիրում հսկողությունն իրականացվում է նշված կազմակերպության համապատասխան ծառայության կողմից, որը ենթակա չէ ՊԵԿ-ին, իսկ փորձագիտական կենտրոնն ու մաքսային ներկայացուցիչն էլ վարում են ինքնուրույն գնային քաղաքականություն: Օրենսդրական այս կամ այն կարգավորումների առկայության նպատակահարմարության վերաբերյալ դիտողություններին արձագանքելը նույնպես դուրս է ՊԵԿ լիազորությունների շրջանակից:

ԼՈՒՐԵՐ.com կայքին առաջարկում ենք այսուհետ, նմանատիպ հրապարակումներ պատրաստելիս, համագործակցել ՀՀ ԿԱ պետական եկամուտների հետ՝ միակողմանի կարծիքներից և թյուրըմբռնումներից խուսափելու համար»: ԼՈՒՐԵՐ.com–ն առանձին հրապարակմամբ կանդրադառնա այս պարզաբանման մեջ առկա տեղեկատվությանը։