Բեռլինը պատրաստ է Անկարային զիջումներ անել. The Telegraph

Գերմանիայի կանցլեր Անգելա Մերկելը պատրաստ է ենթարկվել Թուրքիայի ճնշմանն ու աջակցել այդ երկրի բնակիչների համար շենգենյան վիզաների չեղարկմանը՝ չնայած Թուրքիայի նախագահ Էրդողանը հրաժարվել է կատարել ԵՄ առանցքային պայմանները։ Այս մասին գրում է The Telegraph-ը՝ հղում անելով իր տրամադրության տակ հայտնված՝ Բեռլինում Մեծ Բրիտանիայի դեսպանի դիվանագիտական նամակագրությանը։

Էրդողանը հրաժարվել է վերանայել ահաբեկչության դեմ պայքարի կոշտ օրենքները, որոնք կիրառվել են գիտնականներին ու լրագրողներին հետապնդելու համար, մինչդեռ դա եղել է առանց վիզայի ռեժիմի տրամադրման նախապայման։

Պարոն Սեբաստիան Վուդը դիվանագիտական հեռագրում, որի բովանդակությունը հայտնի է դարձել պարբերականին, նշել է, որ Մերկելի գրասենյակում պատրաստ են «փոխզիջումային ձևակերպման» ահաբեկչության դեմ պայքարի մասին օրենքի հարցում։

Իր հերթին Թուրքիայում բրիտանացի դեսպան Ռիչարդ Մուրը նախազգուշացնում է, որ եթե վիզային ռեժիմի ազատականացում տեղի չունենա, ապա դա կզայրացնի Էրդողանին, և նա ներգաղթյալների համար «կբացի ջրարգելակները» դեպի Եվրոպա։