ՌԴ Քննչական կոմիտեն պահանջել է ձերբակալել մայիսի 6-ի անկարգությունների կազմակերպիչներին

Ռուսաստանի Քննչական կոմիտեն հանձնարարել է մոսկովյան ոստիկանությանը պարզել մայիսի 6-ին Մոսկվայի Բոլոտնայա հրապարակում տեղի ունեցած անկարգությունների կազմակերպիչների ինքնությունը և ձերբակալել նրանց, հայտնում է gazeta.ru-ն:

ՌԴ Քննչական կոմիտեի լրատվական ծառայության փոխանցմամբ՝ ոստիկանության տուժած աշխատակիցներն ու ականատեսները մանրամասն կերպով նկարագրել են ОМОН-ի և ցուցարարների միջև տեղի ունեցած բախման թե՛ կազմակերպիչներին և թե՛ մասնակիցներին:

Քննիչները նաև ուսումնասիրում են այն տեղեկատվությունը, որ անկարգությունները եղել են «նախապես ծրագրված»:

Հիշեցնենք, որ ավելի վաղ «Միլլիոնների երթի» ժամանակ տեղի ունեցած անկարգությունների մասով հարուցված քրեական գործի շրջանակներում որպես վկա հարցաքննվել են ընդդիմադիր շարժման առաջնորդներ Ալեքսեյ Նավալնին և Սերգեյ Ուդալցովը, որոնք ներկայումս վարչական պատիժ են կրում Մոսկվայում՝ «անժամկետ զբոսանքների» ընթացքում թույլ տված իրավախախտումների համար: