Ի՞նչ ակնկալել Վարշավայում ՆԱՏՕ-ի գագաթնաժողովից. The Financial Times

ՆԱՏՕ-ի ղեկավարներն այս շաբաթ Վարշավայում հավաքվում են մեծ անվստահության և աճող անկայունության ժամանակներում՝ The Financial Times-ում հիշեցնում է Միջազգային հարաբերությունների Չիկագոյի խորհրդի նախագահ, ՆԱՏՕ-ում ԱՄՆ նախկին դեսպան Իվո Դալդերը: Ռուսաստանը նորից ռազմական սպառնալիք է դարձել ալյանսի արևելյան սահմանների համար: Միգրանտների մեծ հոսքերը հասել են Եվրոպայի ափեր: Ահաբեկիչները գրոհում են մայր ցամաքի քաղաքների վրա: ԵՄ-ն բախվել է իր պատմության ամենամեծ ճգնաժամին Մեծ Բրիտանիայի հեռանալու պատճառով: Խաղադրույքները Վարշավայում բարձր են՝ ՆԱՏՕ-ի ղեկավարների համար, անվտանգության համար, տրանսատլանտյան հարաբերությունների համար:

Առաջինը և գլխավորը՝ ՆԱՏՕ-ի ղեկավարները կհաստատեն ռուսական ագրեսիայի առավել հուսալի կասեցման որոշումը՝ բալթյան երեք երկրներում և Լեհաստանում չորս մարտական գնդերի տեղակայման մասին՝ յուրաքանչյուրը հազար զինվոր: ՆԱՏՕ-ի գլխավոր քարտուղար Յենս Ստոլտենբերգն ասաց, որ դա «կոլեկտիվ պաշտպանության ամենածանրակշիռ ամրապնդումն է սառը պատերազմի ավարտի ժամանակներից սկսած»:

Երկրորդ՝ ՆԱՏՕ-ն կարող է հայտարարել հարավից եկող սպառնալիքների դիմակայության նոր միջոցների մասին՝ խոսքն ահաբեկիչների մասին է և միգրացիոն մեծ հոսքերի: ՆԱՏՕ-ի ոչ մի երկիր, որ ենթարկվել է ահաբեկիչների գրոհին, ալյանսին կոչ չի արել գործողության մեջ դնել Կանոնադրության 5-րդ հոդվածը, թեպետ ահաբեկչությունները որոշակիորեն «զինված հարձակում» են: Այդ հոդվածի համաձայն՝ ՆԱՏՕ-ի մեկ երկրի վրա հարձակումը հավասարազոր է ամբողջ ալյանսի վրա հարձակման:

Վերջապես՝ Բրեկզիտի հետևանքով սամմիթում կքննարկվի ՆԱՏՕ-ի (որի անդամ Մեծ Բրիտանիան մնում է) փոխգործակցության խնդիրը ԵՄ-ի հետ: ՆԱՏՕ-ԵՄ համագործակցության ընդլայնման հարցը հեշտ չէ: Եվրոպական որոշ երկրներում, ԵՄ ղեկավարության մեջ վաղուց է հասունացել ԵՄ-ի անդամների միջև կապերն ամրապնդելու ցանկությունը՝ ընդհուպ եվրոպական բանակի ստեղծումը: Բրիտանիան դեմ է այդ ձգտումներին, բայց Բրեկզիտը թուլացնում է նրա ազդեցությունը: Եվրոպայի պաշտպանունակության տեսակետից ՆԱՏՕ-ն և ԵՄ-ն կարող են լրացնել միմյանց, ինչպես ցույց տվեցին ծովահենների դեմ գործողությունները Սոմալիի ափերի մոտ, խաղաղության աջակցությունը Կոսովոյում և մարդկանց առևտրի դեմ պայքարը Էգեյան ծովում:

Վարշավայում ալյանսի ղեկավարները հազիվ թե մանրամասնորեն քննարկեն ԵՄ-ի հետ համագործակցության ամրապնդման նրբությունները: Սակայն Բրեկզիտը նորից շեշտեց համագործակցությունը կարգի բերելու կարևորությունը՝ միասնության և համատեղ ջանքերի ընդհանուր արդյունավետության բարձրացման ապահովման հաշվին: Վարշավայի սամմիթը բարենպաստ ժամանակներում է հրավիրվում: Այն պահին, երբ անհրաժեշտ է ցույց տալ, որ Եվրոպայի և Հյուսիսային Ամերիկայի երկրները առաջվա պես պատրաստ են պաշտպանելու ընդհանուր անվտանգությունը համատեղ ջանքերով ու համագործակցությամբ: Դիմադրություն ցույց տալով Ռուսաստանին, պատասխանելով հարավից եկող սպառնալիքին և ամրապնդելով ԵՄ-ի հետ կապերը, ՆԱՏՕ-ի ղեկավարները կարող են հաստատել այդ փորձությունն անցնելու իրենց պատրաստակամությունը: