Վրաստանում կան ուժեր, որոնք ցանկանում են թշնամանք սերմանել հայ–վրացական հարաբերություններում. Արչիլ Չկոիձե

Լուրեր.com-ի ունեցած տեղեկություններով՝ օրերս Վրաստանում հարձակում են գործել «Հերակլ II միություն» հասարակական կազմակերպության գրասենյակի վրա և կողոպտել այն։ Նշենք, որ այս կազմակերպությունը Վրաստանում հայտնի է իր պրոհայկական և պրոռուսական հայացքներով և հանդես է գալիս երկրում մուսուլմանական մզկիթների կառուցման դեմ։

Լուրեր.com-ի թղթակցի հետ հեռախոսազրույցում կազմակերպության նախագահ Արչիլ Չկոիձեն ներկայացրեց տեղի ունեցածը։

- Պարո՛ն Չկոիձե, դուք հաստատո՞ւմ եք ձեր կազմակերպության գրասենյակի վրա կատարած հարձակման մասին լուրը

-Այո։

-Ձեր կարծիքով կապվա՞ծ է դա արդյոք ձեր պրոհայկական և պրոռուսական գործունեության հետ։

-Այո, իհարկե։ Ես կարծում եմ, որ դրա պատճառներից մեկն էլ կարող է լինել նաև Վրաստանում մզկիթների կառուցման դեմ ծավալած մեր գործունեությունը: Ես ցանկանում եմ շեշտել, որ Վրաստանում, որտեղ բնակչության 90 տոկոսը քրիստոնյա է, քչերն են ուզում, որ մզկիթ կառուցվի: Մտադրություն է եղել մզկիթ կառուցել նաև Ախալքալաքում և Ախալցխեում, որտեղ ընդհանրապես մուսուլմաններ չկան և բնակչության գրեթե 90 տոկոսը քրիստոնյա հայեր են: Ասեմ, որ ավելի վաղ հարձակում է եղել նաև մեր կայքի վրա:

-Իսկ ի՞նչ գործունեություն է ծավալում ձեր կազմակերպությունը:

-Մեր կազմակերպության գլխավոր նպատակը Ռուսաստանի և Վրաստանի միջև բարեկամական հարաբերությունների հաստատումն է, ինչպես նաև բարիդրացիական հարաբերությունների ձևավորումը բոլոր հարևան քրիստոնյա պետությունների հետ, ինչպես, օրինակ, Հայաստանը։ Այժմ մենք փորձում ենք կարգավորել հարաբերությունները վրացիների ու աբխազների միջև։ Վերջերս մեր կազմակերպությունը մի ֆիլմ էր նկարահանել Վրաստանում հայկական եկեղեցիների մասին, որոնք գտնվում են խայտառակ վիճակում։ Ծրագրում ենք ֆիլմ նկարահանել նաև հայ-վրացական հարաբերությունների մասին, քանի որ այս երկու երկրներն արդեն դարերով պաշտպանում են քրիստոնեությունը Կովկասում։ Հայտարարում եմ, որ Վրաստանում կան ուժեր, որոնք ցանկանում են թշնամություն սերմանել հայ–վրացական հարաբերություններում և որոնք ֆինանսավորվում են ադրբեջանական և թուրքական ոչ կառավարական կազմակերպությունների կողմից, ինչպիսին է, օրինակ, «Շոքադ»-ը։ 

-Ձեր կարծիքով գրասենյակի կողոպուտի և հարձակման հետ այդ կազմակերպությունները կապվա՞ծ են։ 

-Ես չեմ կարող ուղիղ մեղադրանք հնչեցնել դրանց հասցեին, սակայն չի բացառվում, որ միջադեպի հետ կապ ունեն այդ արմատական ուժերը, որոնց նյարդայնացնում է Վրաստանում քրիստոնեության տարածմանը նպաստող մեր գործունեությունն ու հարևան քրիստոնյա պետությունների հետ բարիդրացիական հարաբերությունները խորացնելու ձգտումը։ Իհարկե, ես դեմ չեմ մուսուլմանների հետ նորմալ հարաբերություններ ունենալուն, բայց Վրաստանը քրիստոնեական պետություն է։ 

-Դուք դիմե՞լ եք ոստիկանություն։

-Այո, բայց չեմ կարծում, թե դա որևէ արդյունք կտա։