Ծաղկահովիտի ընտրությունների ֆենոմենը

Ի սկզբանե որևէ մեկը պատրանք չուներ, որ իր հայրենի գյուղում առաջադրված Արայիկ Խանդոյանը հաջողության որևէ շանս ունի: Միայնակ Գայլի առաջադրումը, սակայն, շատ հետաքրքիր իրողություններ բացահայտեց:

Ծաղկահովիտի՝ սեպտեմբերի 18-ի ընտրությունը դարձավ այն մանրակերտը, որը բացահայտեց հանրային տրամադրություները մարդկանց վերբերմունքը քաղաքականության և դրա մեթոդների հանդեպ:

Արայիկը կռված տղա է, իր գյուղում և դրանից դուրս ունի հերոսի համարում: Դա չէին հերքում, ընդ որում, հրապարակավ, ոչ միայն նրա համագյուղացիները, այլ նաև մրցակիցները՝ այդ թվում արդեն նախկին գյուղապետը:

Բայց դրանով հանդերձ Խանդոյանը պարտվեց, որովհետև մարդիկ գիտակցորեն կամ ենթագիտակցորեն չեն արդարացնում փոփոխությունների այն ճանապարհը, որ ընտրել են Միայնակ գայլն ու նրա ընկերները: Ինչքան էլ «Սասնա Ծռերը» սահմանազատվի իր առանցքային դեմքերից մեկի առաջադրումից՝ ծաղկահովիտցիների դիրքորոշումը հենց գնահատականն է նրանց վարքագծին:

Իշխանությունների ռեպռեսիաներն ու վախի գործոնը անշուշտ դեր խաղացել են, սակայն միայն դրանով չի կարելի պայմանավորել Արայիկի պարտությունը: Եթե միայն դա լիներ խնդիրը՝ համոզված հաղթանակ պետք է տաներ իշխանության բռնության հետ ասոցացվող հանրապետական գյուղապետ Երվանդ Խաչատրյանը, սակայն նա նույնպես պարտվեց, որովհետև ծաղկահովիտցիների ու, համոզված եմ, ոչ միայն նրանց համար, եթե մերժելի են «Սասնա Ծռերի» պայքարի մեթոդներն, ապա ատելի են այն ամենն ու յուրաքանչյուր մարդ, որոնք նույնանում են գործող իշխանությունների հետ:

Ծաղկահովիտցիները, հայաստանցիներն ուզում են փոփոխություններ և փնտրում են այն ուժերին, մարդկանց, որոնք դրանք կարող են կյանքի կոչել: Հասարակությունը մերժում է զենքի ուժով պահպանվող իշխանությունը և նմանապես այն փոխելու զինված տարբերակը: Այլընտրանքի փնտրտուքը կամ այս պարագայում սրա բացակայությունը ծաղկահովիտցիների ընտրությունը կանգնեցրել են մի մարդու վրա, ով նախկինում տասը տարի գյուղապետ է եղել և մեղադրվել է տեղական բյուջեի միջոցները յուրացնելու մեջ:

Հենց այստեղ էլ հանգում ենք մեր հասարակության իրական ողբերգությանը: Ծաղկահովիտցիները մեկ առանձին վեցրած գյուղ և մեր ողջ հասարակությունը զրկված են իրական այլընտրանքից:

Մենք մերժում ենք իշխանությունների այլանդակություններն ու նրանց հակադրվողների արկածախնդրությունը, սակայն դրանով էլ մեր ընտրությունը վերջանում է՝ ստեղծված համակարգին ու վիճակին այլընտրանք չլինելու պատճառով:

Սարգիս Հակոբյան