Վաչե Գաբրիելյանը մեկնաբանել է Հայաստանի տնտեսության ծանր վիճակի մասին վարչապետի հայտարարությունը

ՀՀ փոխվարչապետ, միջազգային տնտեսական ինտեգրման և բարեփոխումների նախարար Վաչե Գաբրիելյանն անդրադարձել է ՀՀ վարչապետ Կարեն Կարապետյանի հայտարարությանը, թե Հայաստանի տնտեսությունը ծանր վիճակում է:

«Հայաստանը որպես կամուրջ դեպի մեծ շուկաներ» թեմայով տնտեսական համաժողովի շրջանակներում լրագրողների հետ զրույցում Վաչե Գաբրիելյանը կարծիք հայտնեց, որ այդ թեզն առաջիկայում առավել մանրամասն կբացվի:

«Իմ տրամաբանությամբ նա շեշտեց, որ նախկին զարգացման ռեսուրսը սպառված է, և անհրաժեշտ են նոր մոտեցումներ, նոր ռեսուրսներ հետագա աճի ապահովման համար: Խոսքը նրա մասին չէ, որ տնտեսական աճ չի եղել, նրա մասին չէ, որ թվերն իրական չեն, այլ խոսքը վերաբերում է զարգացման տնտեսական մոդելին, որը առկա էր, և հարկավոր է նոր մոտեցում, որը շուտով կշարադրվի վարչապետի կողմից: Զարգացման հեռանկարների տեսակետից, եթե մենք անդրադառնում ենք այն ռեսուրսին, որ կա զարգացման համար, ապա վիճակը ծանր է»,- ասաց նա։

Հարցին, թե Հայաստանի այդ ծանր վիճակն ինչպես է անդրադառնում ներդրումների և այլ երկրների հետ հարաբերությունների վրա, Վաչե Գաբրիելյանն ասաց, որ ներդրումների հարցում Հայաստանի ծանր վիճակը որևէ վատ կերպ չի արտացոլվում: «Կարեն Կարապետյանի միտքը նրանումն է, որ անհրաժեշտ է շատ մեծ քանակի ներդրումներ, ներդրումների ներգրավում և չեմ կարծում, որ այստեղ կա հակասություն»,-ասաց նա: