Արա Մինասյանն իր պետական պարգևը առողջապահական ողջ համակարգինն է համարում

«Սուրբ Գրիգոր Լուսավորիչ» բժշկական կենտրոնի տնօրեն Արա Մինասյանը լավ է հիշում ՀՀ անկախության հռչակման օրը, երբ Հայաստանը սկսեց շարժվել այդքան բաղձալի անկախության ճանապարհով: «Բոլորս էինք ուզում անկախանալ, բոլորս էինք գնացել այնտեղ հանուն անկախության»,-վերհիշեց Արա Մինասյանը, ով ՀՀ անկախության 25-ամյակի կապակցությամբ պարգեւատրվեց «Հայրենիքին մատուցած ծառայությունների համար» 2-րդ աստիճանի մեդալով: «Սա բարձր պարգեւ է: Այն ոչ թե մի մարդու կամ մի անձնակազմի է տրված, այլ ողջ համակարգին»,-նշեց նա:

ԲԿ-ի տնօրենի խոսքով՝ այս տարիների ընթացքում ոլորտում իրականացված փոփոխությունները հատկապես կապված են առողջապահական հիմնարկների շինարարության հետ: «Կարող եմ առանձնացնել Համաշխարհային բանկի հսկայական ներդրումային ծրագրերը, պետբյուջեի ծրագրերը, ինչպես նաեւ անհատ ընկերությունների, օրինակ՝ «Տաշիր» ընկերության կողմից կառուցվող Ստեփանակերտի հիվանդանոցը: Ընկերությունը հիմա աշխատում է Վանաձորում եւ հարակից համայնքներում մասնաշենքեր կառուցելու ուղղությամբ»,-տեղեկացրեց բժշկական կենտրոնի տնօրենը:

ՀՀ անկախության 25 տարիների ընթացքում գիտության, կրթության, մշակույթի, առողջապահության, ռազմական և այլ ոլորտներում իրականացրած աշխատանքների եւ երկրի զարգացման գործում զգալի ներդրումներ կատարելու համար Նախագահ Սերժ Սարգսյանի կողմից պետական պարգևների են արժանացել նաեւ մի խումբ այլ անձինք: Մասնավորապես, նրանց շարքում էին բժշկական գիտությունների դոկտոր, պրոֆեսոր Արա Բաբլոյանը, ՀՀ ժողովրդական արտիստ Ռուբեն Մաթեւոսյանը, հայ արձակագիր, դրամատուրգ Պերճ Զեյթունցյանը, ՀՀ ժողովրդական արտիստ, երգչուհի Ռաիսա Մկրտչյանը, հեռուստահաղորդավար, ՀՀ ժողովրդական արտիստ Նարա Շլեպչյանը, ՀՀ պաշտպանության նախկին նախարար Վաղարշակ Հարությունյանը, Արցախի հերոս Արկադի Տեր-Թադևոսյանը եւ այլք: