Սուքիասյանը վնասվածքների համար մեղադրեց լրագրողներին, իսկ հրաժարական կտար, եթե հավաքականում ծանր վիճակ չլիներ

Այս ծանր վիճակը չլիներ, ես հաստատ հրաժարական կտայի: ԼՈւՐԵՐ. com-ի թղթակցի փոխանցմամբ, ԱԱ 2018-ի ընտրական փուլի Հայաստան-Ռումինիա խաղից հետո այդ մասին լրագրողների հետ զրույցում ասաց Հայաստանի ազգային ընտրանու գլխավոր մարզիչ Վարուժան Սուքիասյանը:

Անդրադառնալով այն հարցին, թե ինչո՞ւ Յուրա Մովսիսյանը չկա հավաքականում, մարզիչը նշեց.

-«Յուրայի հետ պայմանավորվածություն ունեի, պետք է հանդիպեինք, բայց նա չեկավ»:

Խոսելով խաղի մասին՝ մարզիչը հավելեց.

«Նրանք իրոք ուժեղ էին: Մենք նման բանի պատրաստ չէինք, երրորդ րոպեից թիմը մնաց տասը հոգով: Մինչև դա՝ նախավարժանքի ժամանակ, Ղադիմյանը դուրս մնաց... Ես ամբողջ մեղքը վերցնում եմ ինձ վրա: Թիմը չեմ թողնի այս ծանր վիճակի մեջ: Բայց եթե ֆեդերացիան պահանջի, անպայման հրաժարական կտամ: Այնքան տղամարդկություն ունեմ, որ պետք է պահեմ թիմը  և կարողանամ այս վիճակից հանել: Դանիայում նախընտրեցի հինգ պաշտպանով խաղալ, այստեղ փորձարկեցի չորս պաշտպան, և սխալվեցինք: Ամբողջ մեղքը վերցնում եմ ինձ վրա»:

Այն հարցին, թե ինչպե՞ս է մարզիչը պատրաստվում թիմը մոտիվացնել, Սուքիասյանը պատասխանեց՝ «Տեսնենք»:

 -«Այն վատ մթնոլորտը, որ տիրում է ձեր մեջ, դրանից է, որ ամբողջ թիմը վնասվածքների մեջ է»,- խոսքը ուղղելով լրագրողներին` ասաց Սուքիասյանը:

Խոսելով Գաել Անդոնյանին փոխարինելու մասին՝ մարզիչն ասաց.

 -«Գայելը վնասվածք չունի, ուղղակի կոպիտ սխալից հետո ինքը ցանկացավ, որ փոխարինենք»:

Հարցին, թե Լեհաստանում ի՞նչ պետք է անել, որ նման արդյունք չգրանցվի՝ մարզիչն ասաց.

 -«Պետք է մտածենք»:

Հաջորդ խաղին անդրադառնալով` մարզիչն ասաց՝ պետք է տղաներին այս վիճակից հանել և մարտական ոգով մտնել դաշտ: