Մնում է Հրապարակն էլ վաճառեն, որ հերթական ավտոկայանատեղին սարքեն ու փող աշխատեն

Վերջին օրերին շատ արագ շրջանառության մեջ դրվեց, որ կառավարությունը մտադիր է աճուրդի հանել Կապի և տրանսպորտի նախարարության շենքը: Եվ ինչպես միշտ՝ այս լուրը ևս հանրությունը շատ բուռն ընկալեց. տարբեր են կարծիքները, տարբեր են նաև մոտեցումները:

ԼՈՒՐԵՐ.com-ի թղթակցի հետ զրույցում ճարտարապետ Սաշուր Քալաշյանը տեսակետ հայտնեց, որ վաճառելու մեջ ոչ մի վատ բան չի տեսնում: Նրա կարծիքով՝ նման որոշման համար, հավանաբար, հիմք է հանդիսացել այն, որ նախարարությունն արդեն տեղակայվել է Վազգեն Սարգսյան փողոցում գտնվող նախարարությունների նոր շենքում և այլևս այդ շենքի գործնական կարիքը չկա: «Որպեսզի այդ շենքն ազատ չմնա, հանել են վաճառքի: Ոչ մի վտանգավոր բան չեմ տեսնում»,- ասաց նա՝ հավելելով, որ  գնորդը որոշակի պարտավորություններ է ստանձնելու:
Ճարտարապետն ընդգծեց նաև, որ անձամբ է ծանոթացել աճուրդի պայմանագրին, որտեղ նշված է, որ  շենքը չպետք է քանդվի, հակառակ դեպքում՝ դատական գործ կհարուցվի: «Աճուրդի պայմանագրում գրված է, որ այդ շենքը համարվում է հուշարձան, որը քանդելու իրավունք ոչ ոք չունի: Գնորդը գնման դեպքում պարտավորվում է պահպանման պարտավորագիր կնքել և  շենքը պահպանել իր տեսքով»,- հավելեց նա:

Մեր դիտարկմանը՝ փորձը ցույց տվել, որ նման շինությունները գնում են, իսկ հետագայում քանդում, Ս. Քալաշյանը չհամաձայնեց՝ պնդելով՝ այո, մինչև հիմա այդպես է եղել, բայց այսօր պայմանագրի մեջ որոշ պարտադիր կետեր են ընդգրկվել: «Աճուրդի մեջ հատուկ գրված է, որ այն ընդգրկված է հուշարձանների ցանկում, և գնողը պետք է պահպանման պայմանագիր կնքի Մշակույթի նախարարության հետ: Որևէ բացասական երևույթ այդ վաճառքի մեջ չկա: Պարզապես քաղաքացիական մոտեցում կարող է լինել: Ինքս էլ չեմ ցանկանա, որ Հանրապետության հրապարակը զրկվի իր վարչական կառույցներից և մնա միայն մեկը»,- եզրափակեց նա:

Մեզ հետ զրույցում մեկ այլ ճարտարապետ Ստեփան Նալբանդյանն էլ իր  տեսակետը հայտնեց, թե կապ չունի շենքը գործում է, թե՝ ոչ, բայց դա չի նշանակում, որ պետք է աճուրդի հանվի: «Մեր ազգային հարստություններից մեկն է, որը հերթական անգամ ուզում են աճուրդի հանել: Հիմա ամեն ինչն էլ վաճառում են: Այստեղ զարմանալի ոչինչ չկա: Իմ խորին համոզմամբ՝ դա վաճառքի հանել չի կարելի: Մնում է Հրապարակն էլ վաճառեն, որ հերթական ավտոկայանատեղին սարքեն ու փող աշխատեն»,- ասաց նա:
Ճարտարապետի խոսքով՝ այդ շինությունը հայկական ճարտարապետության գոհարներից մեկն է, որն ամբողջացնում է Հանրապետության հրապարակը.«Դա մեր ճարտարապետության գլուխգործոցներից մեկն է, որին չպետք է ձեռք տալ»:

Արմինե Եփրեմյան