Իշխանամետ ընդդիմադիրների ինտիմ խաղը

Վանաձոր։ Ցերեկ։ Քվեարկություն։ Գաղտնի։ Հաղթեց ՀՀԿ թեկնածուն։ Բոլորի կասկածելի հայացքներն ուղղվեցին ՕԵԿ-ի ավագանիներին…

Համացանցում պտտվող նմանատիպ բազմաթիվ կատակների է կարելի հանդիպել: Շատերն են համոզված, որ «Լուսավոր Հայաստանի» պայծառ ուղին մթնեցրեց վերածնված ՕԵԿ-ը, կասկածի համեմատաբար փոքր մասնաբաժին ուղղված է ԼՀԿ-ին, իսկ դե Մարուքյանենք հո՞ Մարուքյանենց չեն կասկածի…

Մի կողմ թողնենք արդեն կայացած փաստը, որ Վանաձորում ՀՀԿ թեկնածու Ասլանյանը 19:14 ձայների հարաբերակցությամբ հաղթեց «Լուսավոր Հայաստանի» թեկնածու Քրիստ Մարուքյանին: Խոսենք արդեն իսկ կայացած մեկ այլ փաստի մասին, որը կարելի է ողբերգական համարել՝ նոր Սահմանադրությունը մեռավ՝ դեռ չծնված:

Վանաձորում այն հողին հանձնեցին իշխանամետ ընդդիմադիրները: Հողին հանձնեցին՝ գոռոցով ու կանանց հատուկ հիստերիայով, մազեր փիտելով ու կուրծք ծեծելով:

Տիկնայք և պարոնայք ժամերով կոկորդ էին պատռում ու առանձնանալ ձգտում՝ ինտիմ, առանձին միաջավայրում քվեարկել էին ուզում…

Ինտիմ էր պետք լուրջ դեմքերով անլուրջ կերպարներին՝ ազգը կործանման հրապարակավ չեն տանում, անմատչելի-գաղտնի միջավայր էր պետք, որ ստացան ժամեր տևած բանակցություններից հետո:

Այս պարագայում գերշահողի կերպարում է իշխանությունը՝ կրկին մի կողմ ենք թողնում հանրապետականի հաղթանակը:

Սա բացարձակ հաղթանակ էր բոլոր ընտրությունների համար, որ ծանր կնիքով փակեցին հազարավոր քննադատների բերաններ, թե բա՝ ընտրությունները կեղծված են, լցոնում են իրականացնում, մահացածների փոխարեն են քվեարկում:

Ո՛չ, ինչպես Գյումրիում էին ընտրել Բալասանյանին, ճիշտ այդպես Վանաձորում էլ ընտրվեց Ասլանյանը՝ բաց և թափանցիկ: Ընդդիմադիրները եկան, նրբորեն ընտրեցին, «պտիչկան» դրեցին հանրապետականի օգտին և լուռ հեռացան:

Ու թող հիմա իրար մեղադրեն ու քար նետեն միմյանց վրա՝ Բարգավաճն ու Վերածնունդը, թող իրար կոկորդ կրծեն ու հայհոյեն:

Ձևական է: Կեղծ: Ճիշտ այնքան ձևական ու կեղծ, ինչպես այն օրենքի երկիրը, որտեղ մենք ապրում ենք:

Սա Հայաստանն է:

Վայելենք:

Հ.Գ. Իսկ եթե, ամեն դեպքում, 30 արծաթով ծախվածները Լուսավորի շարքերում են…

Անի Սահակյան

Լուսանկարը՝ ֆոտոլուրի