Ոչ ոք չի ուզում որ Հայաստանի գործերը լավանան. կառավարման փորձագետ

ԼՈՒՐԵՐ.com-ի զրուցակիցն է կառավարման փորձագետ Հարություն Մեսրոբյանը:

- Այս օրերին ակտիվ փոփոխություններ են տեղի ունենում կառավարման համակարգում: Դուք հաճախ եք բարձրաձայնում, որ այդ փոփոխություններն այսօր անհրաժեշտություն են: Ըստ Ձեզ՝ այսպիսի փոփոխություններով առաջիկայում ռացիոնալ փոփոխություններ մենք կունենա՞ք:

- Նախ ասեմ, որ կառավարման համակարգում դեռ էական փոփոխություններ տեղի չեն ունեցել: Ոչ փոխվում է կառուցվածքը, ոչ՝ այդ կառավարման սկզբունքները… Համարյա չեն փոխվում նաև կառավարության տարբեր ստորաբաժանուների գործառույթները: Այսինքն՝ դեռ վաղ է խոսել համակարգային ու ռացիոնալ փոփոխությունների մասին. դա դեռ չկա, բայց ինչ խոսք, որոշ գործեր արդեն արվում են: Այդ քայլերը ես նախապատրաստական կանվանեի, իսկ թե կկարողանանք հաղթահարել այս նախապատրաստական փուլը և անցնել գործնական քայլերի, դժվարանում եմ ասել, ժամանակը ցույց կտա: Հավանաբար մի քանի ամիս հետո պարզ կդառնա:

- Նորանշանակ վարչապետ Կարեն Կարապետյանը պաշտոնավարման առաջին իսկ օրից խոսեց «պրիմիտիվ գողությունների» մասին: Վարչապետի այդ հայտարարությունը ոմանց դուր չեկավ, ոմանց մոտ էլ հույսեր արթնացրեց: Ի՞նչ եք կարծում, Կարեն Կարապետյանը կկարողանա՞ պրիմիտիվ գողություններ վերացնելով  ինչ-որ փոփոխություններ անել երկրում:

- Այն, որ նա խոսել է պրիմիտիվ գողությունների մասին, դա քայլ չէ և չեմ կարող մեկնաբանել, դրա բարոյական իրավունքը չունեմ:

- Իսկ կադրային փոփոխություննե՞րը…

- Կադրային փոփոխությունները, ճիշտ է ամբողջական տրամաբանության մեջ չեն, բայց արդեն մի բան նշմարվում է, որ այո, նա լուրջ է մտադրված: Այդ քայլով նա ցույց տվեց, որ ուզում է ազատվել օդիոզ գործիչներից: Այսինքն՝ նրանցից, ովքեր ժողովրդի աչքի փուշն են: Նրանցից, ովքեր կա՛մ պիտանի չեն, կա՛մ ընդհանրապես իրավունք չունենք լինել պետական կառավարման համակարգում: Այս իմաստով՝ տեսանելի է, որ նա ուզում է կառավարությունն ավելի գրավիչ դարձնել:

- Բայց, փաստորեն, այդ տանիքի տակ հիմա էլ նա է հավաքում իր յուրայիններին: Դրա վառ ապացույցն են նոր նշանակումները, որտեղ նշանակվել են Գազ-Պրոմ Արմենիա ընկերության ներկայացուցիչները…

- Դա կարող է ունենալ և՛ դրական, և՛ բացասական էֆեկտ: Բացասականը մեզ բոլորիս հայտնի՝ մերոնքականներն են, որն իհարկե վտանգավոր է, բայց եթե այլ տրամաբանությամբ է դա արվում, այսինքն՝ յուրային՝ ծանոթ, որոշ չափով նույն գաղափարով եփված կադրեր, դա նորմալ է: Թե հիմա յուրայինների բերումն այդ երկուսից որն է, դեռ վաղ է ասելը: Հավանաբար դա պարզ կդառնա առաջին հստակ գործողություններից հետո, երբ հասկանանք՝ դա թայֆա է, թե թիմ: Մենք այս ընթացքում այնքան ենք տեսել թայֆաներ, որ թիմերը չենք տարբերում:

- Ձեր կարծիքով, ավելի լավ կառավարման համակարգ ունենալու համար այսօր մեզ ի՞նչն է պակասում: Այսօր մեզ ի՞նչն է խանգարում, որպեսզի ունենանք արմատական փոփոխություններ:

- Մեզ պակասում են կառավարման մասնագետները: Բացի դա, եթե անկեղծ լինենք, ապա այսօր՝ բացի ժողովրդից, ոչ ոք չի ուզում դրական փոփոխություններ: Այո, ո ՛չ իշխանությունները, ո՛չ էլ ըննդիմությունը՝ լինի դա քաղաքական, թե քաղաքացիական, ծայրահեղ, թե չափավոր, ոչ մի ուժ չի ցանկանում, որպեսզի Հայաստանը ոտքի կանգնի: Ես բազմիցս ասել եմ, որ սոցցանցերում և ԶԼՄ-ներով նրանք ուղղակի մեյմունություն են անում:

- Իսկ ինչո՞ւ չեն ուզում:

-Հայաստանի առողջացումը պարտադիր անցնում է հետևյալ հանգրվաններով. պետական կառավարման համակարագի կտրուկ կրճատմամբ, և ստվերի ու ոչ բնական մենաշնորհների դեմ պայքարով: Առաջին դեպքում տուժում է չինովնիկա-բյուրոկրատական դաշտը, երկրորդ դեպքում՝ օլիգարխիան: Այս երկու դասերը, սակայն, որպես կանոն, փոխկապակցված են իշխանության հետ: Հետևաբար իրենք հոգու խորքում դեմ են Հայաստանի առողջացմանը:

Ընդդիմությունը ևս դեմ կլինի, որովհետև եթե կառավարությունը հաջողվի, ապա 2017թվականին չեն կարողանա նույն հռետորաբանությամբ հանդես գալ: Այսինքն՝ ասելիք չեն ունենա: Ծայրահեղ ընդդիմության կարիքն առավել ևս չի զգացվի, որովհետև Հայաստանի գործերի լավանալը նաև այդ թևին դուր չի գա այն պարզ պատճառով, որ իրենց գոյությունը դառնում է անիմաստ:

Այսինքն, բոլոր նրանք, ովքեր այսօր երևում են, հոգու խորքում բոլորն էլ դա չեն ցանկանում: Ժողովուրդն էլ սպասումների մեջ է. մեծ մասը բացասական, որովհետև այս քսան հինգ տարիների ընթացքում այդ փոփոխությունների մասին միայն լսել է, մյուս մասն էլ՝ դրական, որովհետև հույսը դեռ չի մարում: Դրա համար էլ Կարեն Կարապետյանն առաջարկեց իջեցնել էլեկտրաէնեգիայի ու գազի սակագները, որ գոնե ժողովրդի մոտ առկա այդ բացասական սպասումները փոքր-ինչ մեղմանան: Փաստորեն՝ ժողովրդի վերաբերմունքը և իմ թվարկած խմբերի իրական չկամությունըհենարան չեն մեր պատկերացրած փոփոխությունների համար: 

 Արմինե Եփրեմյան