Լևոն Ալթունյանը ծանոթացել է Առողջապահական ծրագրերի իրականացման գրասենյակի աշխատանքին

ՀՀ առողջապահության նախարար Լևոն Ալթունյանն այցելել է ՀՀ ԱՆ Առողջապահական ծրագրերի իրականացման գրասենյակ, ծանոթացել իրականացվող և արդեն կյանքի կոչված ծրագրերին։ Այս մասին տեղեկացնում են ՀՀ առողջապահության նախարարության հասարակայնության հետ կապերի բաժնից՝ հավելելով. «20 տարվա ընթացքում իրականացված ծրագրերը հիմնված են եղել երկրի առաջնահերթ կարիքների, ինչպես նաև կառավարության գերակա և ռազմավարական ծրագրերի վրա։ Արդյունքում օպտիմալացվել է հանրապետության առողջապահական համակարգը' հիվանդանոցների թիվը 111-ից հասցնելով 87-ի։ Մարզային 14 հիվանդանոց արդիականացվել է, որից 2-ը' Գյումրու և Մեղրու բժշկական կենտրոնները, կառուցվել են հիմքից։ Այս հիվանդանոցների որակյալ և մատչելի ծառայություններից կարող Է օգտվել մարզերի շուրջ 830 հազար բնակչություն։

Լուրջ առաջընթաց է արձանագրվել մարզերի առողջության առաջնային օղակում։ Առաջնորդվելով երկրի որդեգրած ռազմավարություններով և զարգացման տեսլականով' ծրագրերն իրականացվել են երկու ուղղությամբ։ Անցած տարիների ընթացքում Համաշխարահային բանկի վարկային ծրագրով կառուցվել և վերանորոգվել է 173 գյուղական ամբուլատորիա և առողջության կենտրոն, ինչպես նաև ՀՀ տարածքում գործող բոլոր ամբուլատորիաները հագեցվել են բժշկական սարքավորումներով, գույքով և պարագաներով։

Ծրագրի շրջանակում միաժամանակ վերապատրաստման դասընթաց է անցել 1676 ընտանեկան բժիշկ և 1804 բուժքույր։ Արդյունքում գյուղական բնակավայրերի 630 հազար բնակչության համար առաջնային օղակում ապահովվել է պատշաճ բժշկական սպասարկում։

Առողջապահական ծրագրերի իրականացման գրասենյակի մասնագետները նախարարին ներկայացրել են նաև առկա խնդիրները։ Մասնավորապես, ժամանակի ընթացքում փոխվել են մոտեցումներն ու պահանջները, հետևաբար համակարգում հետագա օպտիմալացման անհրաժեշտություն է առաջացել։ Դեռևս մտահոգիչ է բժշկական կադրերի անհամաչափ բաշխվածությունը Երևանում և մարզերում, ինչպես նաև' մարզերի ներսում։ Բարելավման կարիք ունի արդիականացված մարզային առանձին հիվանդանոցների կառավարումը։ Դեռևս առկա է գյուղական շուրջ 40-50 ամբուլատորիաների ենթակառուցվածքների բարելավման խնդիր։

Լևոն Ալթունյանը հետաքրքրվել է, թե ինչ մեթոդաբանությամբ են գնահատվում իրականացված ծրագրերի արդյունավետությունը թե՛ ֆինանսապես, թե՛ բժշկական ծառայությունների որակի, մատչելիության և դիմելիության ցուցանիշներով։ Նախարարին ներկայացվել են այդ ուղղությամբ գրասենյակի խմբերի կողմից կատարված ուսումնասիրությունները, ինչպես ըստ մարզերի, այնպես էլ' ըստ առանձին հիվանդանոցների։

Նախարարը հանձնարարել է առանձին հանդիպում կազմակերպել՝ իրականացված բոլոր ծրագրերի արդյունավետության գնահատման ուսումնասիրություններին առավել մանրամասն ծանոթանալու համար։

«Մենք պետք է համատեղ խորը վերլուծություն կատարենք, որպեսզի մեր ունեցած գումարներով և ներուժով կարճ ժամանակում կարողանանք հասնել շոշափելի արդյունքների»,- ասել է Լևոն Ալթունյանը։