Դպրոցներում պետք է բացառվեն հովանավորչությունը, շահերի բախումը. Վարչապետի հանձնարարականը

Կառավարության այսօրվա նիստում վարչապետ Կարեն Կարապետյանը հանձնարարականներ տվեց նաև ՀՀ կրթության և գիտության նախարար Լևոն Մկրտչյանին:

Մասնավորապես՝ յոթնօրյա ժամկետում նախարարը քաղաքապետարանի և մարզպետարանների համագործակցությամբ պետք է ներկայացնի ծրագիր՝ կրթության ոլորտում ազգակցական կապերի միջոցով հովանավորչությունները և շահերի բախումները բացառելու ուղղությամբ:

Վարչապետը հայտարարեց, թե չի բացառվում, որ լինեն դպրոցներ, որտեղ միևնույն ժամանակ աշխատեն և սովորեն մայր ու աղջիկներ, կամ այլ ազգակցական կապեր ունեցող քաղաքացիներ:

«Հանձնարարում եմ ԿԳ նախարարին, մարզպետներին, Երևանի քաղաքապետին ներկայացնել առաջարկություններ՝ հանրակրթական հաստատությունների հմտության գործընթացում ազգակցական կապերի, հովանավորչության և շահերի բախման երևույթների բացառման ուղղությամբ: Թե ինչի մասին է խոսքը, բոլորդ շատ լավ հասկանում եք: Պետք է տարբերակել՝ որտեղ է օբյեկտիվ, որտեղ՝ սուբյեկտիվ»,- շեշտեց Վարչապետը:

Բացի այս՝ Վարչապետը նշեց, որ գյուղական դպրոցների զարգացման հայեցակարգի շրջանակում՝ շաբաթական առնվազն մեկ դպրոցի հետ պետք է ապահովել հեռահաղորդակցային կապի իրականացում: «Մենք ունենք ԿՏԱԿ ՊՈԱԿ, որն ապահովել է կամուրջներ, կապեր բոլոր դպրոցների հետ, և, որը, սակայն, ցավոք սրտի, այս պահին էֆեկտիվ չի օգտագործվում: Մենք հստակ ձևակերպել ենք, որ բոլոր համայնքների դպրոցներն այդ հնարավորությունն ունենան: Որտեղ ուսուցիչների պակաս կա, որտեղ համապատասխան մակարդակի պակաս կա՝ պետք է հնարավորություն տալ այդ բացերը լրացնել: Կարծում եմ՝ ճիշտը սա է, լավ բան ենք անում»,- ասաց նա: