Մերոնք դրսում. մի ֆուտբոլիստի պատմություն (լուսանկարներ)

ԼՈւՐԵՐ.com-ը պարբերաբար ներկայացնում է դրսում հանդես եկող երիտասարդ հայ խաղացողներին:

Արթուր Մարտոյանն է, 19-ամյա երիտասարդ ֆուտբոլիստն, ով իր առաջին քայլերն է անում մեծերի ֆուտբոլում:

Արթուրը հանդես է գալիս Իսպանիայի առաջնության 5-րդ դիվիզիոնում, որն, ինչպես ինքն է նշում, իր որակով շատ քիչ է զիջում ավելի առաջատար լիգաներին: Սա ֆուտբոլիստի առաջին տարին է մեծահասակաների ֆուտբոլում: Նախորդ տարի նա հանդես է եկել երիտասարդական լիգայում:

ԼՈւՐԵՐ.com-ը զրուցեց RSD Alcala ակումբում հանդես եկող կիսապաշտպանի հետ` պարզելու, թե ինչպիսին է պատկերացնում երիտասարդը իր ֆուտբոլային կարիերան:

Առաջինը, որ հարցրինք Արթուրին, թե ինչո՞ւ հենց ֆուտբոլը, պատասխանում հնչեցին՝ «պաշտում էի այս սպորտաձևը», «աչքերս փայլեցին», «այն ինձ ձգում է», «սարսափելի դուր է գալիս» արտահայտությունները:

Երիտասարդ խաղացողն, ով փոքր տարիքում Հայաստանից տեղափոխվել է Ռուսաստան, ֆուտբոլ սկսել է խաղալ դպրոցական տարիքից:

«Առաջին դասարանում մեզ մոտ եկան տարբեր սպորտաձևերի մարզիչներ: Ես ընտրեցի ֆուտբոլը: Պաշտում էի այդ սպորտաձևը: Հայրս նույնպես ֆուտբոլիստ է եղել, այնպես, որ երկար չմտածեցի: Ընտրեցի ֆուտբոլը, որովհետև այն ինձ ձգում էր, ամբողջ oրը բակում գնդակով էի` ընկերներիս հետ, երբեմն էլ` հայրիկիս: Այս սպորտաձևն ինձ սարսափելի դուր է գալիս, այլ բացատրություն չեմ գտնում: Երբ ապագա մարզիչս եկավ դասարան, աչքերս փայլում էին, ուշադրությամբ լսում էի, թե երբ է լինելու մեր առաջին մարզումը»,- նշեց Արթուրը՝ չհերքելով, որ առաջին մարզմանը ներկայացել է ուշացումով.

 «Ուշացա: Դա առաջին ու վերջին անգամն էր, նման բան այլևս չկրկնվեց»:

Ռուսաստանում երտասարդ խաղացողը արժանացել է տարբեր մեդալների, դիպլոմների, լավագույն ֆուտոլիստի կոչման:

Իսպանիայում, ինչպես ինքն է նշում, բոլորովին այլ համակարգ է:

«Այստեղ թիմերը ավելի շատ են: Այստեղ դիպլոմներ չեն շնորհում: Թիմն արժանանում է գավաթի, եթե լիգայում առաջատարն է: Երկու տարի առաջ Մ19 թիմի կազմում հաջողության հասանք Liga Nacional-ում, որը Իսպանիայում ուժեղությամբ երկրորդ դիվիզիոնն է երիտասարդական առաջնությունում: Հաջորդ տարին զբաղեցրինք 7-րդ տեղը` «Ռեալի», «Ատլետիկոյի», «Ռայո Վալյեկանոյի» և այլ թիմերի շրջանում: Այս ամենը ինձ օգնեց լավ թիմ գտնել մեծերի ֆուտբոլում»:

Ներկայիս թիմի մասին խոսելիս՝ Արթուրը նշեց, որ իրեն դուր է գալիս իր թիմը.

«Այստեղ խաղում են մինչև 21 տարեկան ֆուտբոլիստներ, ովքեր պրոֆեսիոնալ են մոտենում խաղին, ինչը զգացվում է նաև դաշտում: Չնայած, որ թիմը հանդես է գալիս 5-րդ դիվիզիոնում, այն իր որակով քիչ է զիջում օրինակ 2B դիվիզիոնին: Ուրախ եմ, որ այս թիմում եմ, բայց սա մեծերի ֆուտբոլում իմ նոր կարիերայի սկիզբն է դեռ»:

Զրուցի ընթացքում Արթուրը նշեց, որ շատ ֆուտբոլիստների խաղով է հիանում՝ առանձնացնելով Կրշտիանու Ռոնալդուին.

«Շատ հարգում և գնահատում եմ Կրիշին, իր պատմությունը, կատարած աշխատանքն ու ձգտումները: Դա ինձ և եղբորս շատ են մոտիվացնում (եղբայրը նույնպես ֆուտբոլիստ է): Երբ դիտում ես նրա ֆիլմը հասկանում ես, որ չնայած ունեցած մեծ գումարներին, նա սիրում է ֆուտբոլը և վերջ: Իմ խաղային դիրքում ինձ դուր է գալիս Կազեմիրոն` «Ռեալից», Վերնբլումը` ԲԿՄԱ-ից»:

Նպատակներ, երազանքներ, սպասումներ... Արթուրն ասաց, թե երազել կարելի է միշտ, դրանք ավերջ են, բայց բոլորը տանում են մեկ նպատակի` բարձրակարգ ֆուտբոլիստ դառնալուն: Արթուրի համար «Անգլիայի առաջնությունում խաղալը հիանալի կլիներ, հավաքականում հանդես գալը` անմոռանալի». 

Իսկ ամենավերջում Արթուրը չմոռացավ ասել, որ ամենաշատը ցանկանում է երջանիկ տեսնել իր մայրիկին:

«Ապագայի հետ կապված մեծ ծրագրեր ունեմ, որպեսզի դրանք իրականացնեմ փորձում եմ կենտրոնանալ ներկայիս վրա: Իսպանիայում շատ գործակալներ են գալիս ակումբների խաղերը դիտում և խաղացողներ փնտրում: Ինքս ունեմ օգնական` նախկին մարզիչս է, ով ինձ համար ակումբներ է փնտրում: Ինձ համար շատ կարևոր է այս մրցաշրջանում լավ խաղալը, որպեզի հաջորդում հանդես գամ 3-րդ դիվիզիոնում: Ինչը քայլ առաջ կլինի:

Ֆուտբոլում բաղձալի երազանքս բարձր խաղամակարդակի հասնելն է և պրոֆեսիոնալ լիգայում խաղալը: Անգլիայի առաջնությունում խաղալը ամենա-ամենահիանալի ձեռբերումս կլիներ կյանքում, հավաքականում խաղալն անմոռանալի կլիներ, կամ էլ օրինակ Չեմպիոնների լիգայում խաղալը: Երազել կարելի է անվերջ: Երզանքները չեն ավարտվում դրանք շատ են, բայց նպատակը մեկն է բարձրակարգ ֆուտբոլ խաղալ: Ինձ և հարազատներիս ապացուցել, որ կարող եմ: Ցանկանում եմ մայրիկիս ամենաերջանիկը դարձնել աշխարհում, նա դրան արժանի է: Երբ դառնամ բարձրակարգ ֆուտբոլիստ նա ավելի երջանիկ կլինի: Բոլոր երազանքներս կապված են ֆուտբոլի հետ, դա միանշանակ է»,- զրույցն ավարտեց Արթուրը:

 Լիանա Թորոսյան