Եթե հանձնարարվել է ուսումնասիրել, կուսումնասիրենք և կասենք. նախարարը՝ վարչապետի հանձնարարականի մասին

ՀՀ սպորտի նախարար Հրաչ Ռոստոմյանը վստահեցնում է, որ յուրաքանչյուր խնդիր, որը կբարձրացվի սպորտի բնագավառում, կստանա համապատասխան լուծում:

Կառավարության նիստից հետո, լրագրողների հետ զրույցում, անդրադառնալով վարչապետ Կարեն Կարապետյանի հանձնարարականին, նախարարը դժվարացավ ասել, թե այս պահին քննարկումները որ ուղղությամբ կընթանան, սակայն հավելեց, որ համապատասխան վարչությունները կզբաղվեն ոլորտում առկա բոլոր խնդիրներով:

Նախարարը նշեց, որ կան հասարակական տարբեր կազմակերպություններ, որոնց աշխատանքի արդյունավետությունն իսկապես ստուգման անհրաժեշտություն ունի: «Պետք է ուսումնասիրել և տալ վերջնական արդյունքներ: Եվ այն ՊՈԱԿ-ներն ու մարզադպրոցները, որոնք այսօր չունեն բազաներ, օրինակ՝ մարզադպրոցները, որոնք չունեն մարզադահլիճներ, որտեղ մարզիկները կարող են մարզվել, պետք է խոշորացվեն ու վերախմբավորվեն»,- հավելեց նա:

Պատասխանելով հարցին՝ Գագիկ Ծառուկյանի ֆինանսական միջոցներն այդ գործընթացում կներգրավվեն, նախարարը արձագանքեց. «Պարոն Ծառուկյանի անձնական միջոցները 2006 թվականից ներգրավված են մեծ սպորտի զարգացման ծրագրում»,- ասաց նա:

Ինչ վերաբերում է մարզային ՀԿ-ների չարաշահումներին, ապա Հ. Ռոստոմյանն ընդգծեց, որ այդ բոլոր հարցերի պատասխանները կտրվեն միայն համապատասխան ուսումնասիրություններից հետո: «Եթե հանձնարարվել է ուսումնասիրել, կուսումնասիրենք և կասենք»,- եզրափակեց նա: