Սայլը տեղից շարժվո՞ւմ է

ՀՀ աշխատանքի և սոցիալական հարցերի նախարար Արտեմ Ասատրյանն այսօր` կառավարության նիստից հետո, անդրադարձավ վարչապետ Կարեն Կարապետյանի հանձնարարականներին:

Հարցին՝ սայլը տեղից շարժվո՞ւմ է, նախարարն արձագանքեց, որ բնականաբար, այս ընթացքում փոխվել են բազմաթիվ մոտեցումներ: Շեշտեց, որ ակտիվ աշխատանքները դեռևս շարունակվում են, բայց միանշանակ ասել, թե ինչ-որ լուրջ փոփոխություններ են տեղի ունեցել, դա այպես չէ. «Բնականաբար, որոշ մոտեցումներ են փոխվել, փոխվել են նաև որոշ ծրագրեր»,- ավելացրեց նա:

Արտեմ Ասատրյանը չհամաձայնեց այն տեսակետի հետ, թե այս ամենն արվում է, քանի որ տարին նախընտրական է, իսկ իշխանությունները ձգտում են որոշակի փոփոխություններ կատարել, որպեսզի ստանան ընտրողի քվեն: «Ես բացարձակ այդ կարծիքին չեմ, քանի որ սա աշխատանքային գործընթաց է: Ես համամիտ չեմ, որ այս ամենը դիտավորյալ ձգձգվում է: Այս աշխատանքային գործընթացում ընդգրկված չէ միայն մեկ մարմին, հետևաբար այս գործընթացը երկարում է»,- ասաց նախարարը:

Անդրադառանալով սոցիալապես անապահով ընտանիքներին մատչելի էլեկտրաէներգիա մատակարարելու խնդրին, Ա. Ասատրյանը նշեց, որ այդ քննարկումները ևս շարունակում են և առաջիկա մեկ ամսվա ընթացքում հավանաբար կլինեն կոնկրետացված մոտեցումներ: «Վարչապետի հանձնարարականը վերաբերում է բացառապես սոցիալապես անապահով շերտերին: Այսօր Հայաստանում գործում է անապահովության գնահատման համակարգ, որտեղ հաշվառված է շուրջ հարյուր երեսուն մեկ հազար ընտանիք»,- ասաց նա: