ՊԵԿ-ին հիշելիս ծնկներս վախից ծալվում են

ՀՀ պետեկամուտների կոմիտեի նախագահն այլևս Վարդան Հարությունյանն է, ով մինչ այս զբաղեցնում էր «Գազպրոմ-Արմենիայի» գլխավոր տնօրենի պաշտոնը:

Վարչապետ Կարեն Կարապետյանի ևս մեկ մտերիմ ղեկավարելու է երկրիս կարևորագույն պաշտոններից մեկը: Այսպիսով՝ կարելի է ասել, որ Կարեն Կարապետյանի կառավարությունն ամբողջովին կազմ ու պատրաստ է, պատրաստ բարեփոխումների, ինչպես իրենք են նշում՝ ինչպես հանձնարարում է նախագահ Սարգսյանը:

Ոլորտ առ ոլորտ քայլեր են արվում ավելի լավ երկիր, ավելի լավ ապագա ունենալու համար,  դա հայտարարվում է պաշտոնապես: Բարդ գործ է: Հայաստանում խնդիրներն ու թերություններն ամենուր են՝ սկսած փոքրիկ թաղապետարանից ու ավարտած մեծագույն գերատեսչություններով: Կոռուպցիա, ստվերային քաղաքականություն, խնամի, ծանոթ ու բարեկամական կապեր: Օրենքի երկիր ասվածը հեռու է Հայաստանից, ու առավել նեխած համակարգ է պետեկամոիտների կոմիտեում:

ՊԵԿ ասելիս հարկային տեսուչներին եմ հիշում, ու ծնկներս վախից ծալվում են,
Չգիտեմ, ինչո՞ւ է այդպես:

ՊԵԿ ասելիս հարկերի քանակի մասին եմ հիշում, արտաբերել եմ ուզում, սակայն շրթունքս ճաքում է,
Չգիտեմ, ինչո՞ւ է այդպես…

Իրականում թե’ ես, թե’ բոլորս շատ լավ գիտենք, որ այս կառույցի հետ գործ ունենալը բարդագույն խնդիր է՝ անհասկանալի, երկար ու ձիգ թղթաբանություն, որի արդյունքում գրեթե միշտ տուժում է դիմող կողմը: Հարկային տեսուչներ, ովքեր գրեթե միշտ հավելյալ գումար են պահանջում:

Թողնելով մի կողմ նախորդների բացերն ու ներկա համակարգը՝ նշենք մեկ դրական հանձնարարական, որ վերաբերվում է ապագային:
ՊԵԿ նոր նախագահին ներկայացնելիս Կարեն Կարապետյանը հայտարարեց, որ մաքսային ծառայությունում վերանայվելու է «հսկիչ գին» ասվածը:

Համառոտ այս թյուրիմացություն-կարգի մասին. օրինակ՝ եթե դուք որևէ երկրում 100 դոլարով գնում եք հեռախոս, որը Հայաստանում արժի ավելի քան 1000 դոլար, այն մաքսազերծվում է ոչ թե ձեր վճարած 100 դոլարի չափով, այլ՝ հայաստանյան գնով: Գործող կարգի համաձայն՝ մաքսավորն իրավունք ունի կասկածել, որ դուք գնել եք այդ սարքը 100 դոլարով, ներկայացված կտրոնն էլ կեղծիք համարել ու կիրառել «հսկիչ գին»-ը…

Մի տեսակ անհավատալի է, որ շուտով Հայաստանը հաջողություն կմաղթի այս տարօրինակ համակարգին, ինչևէ…

Ի դեպ, ՊԵԿ նոր ղեկավարին ներկայացրեց, ոչ թե Սերժ Սարգսյանը, ինչպես դա եղավ նախորդ ղեկավարի դեպքում, այլ՝ Կարեն Կարապետյանը:

Դա երկու իմաստ ունի՝ կա’մ նախագահը ուզում է բոլորիս հասկացնել, որ այսուհետ ինքը կապ չունի հարկային կեղտոտ խաղերի հետ, կա’մ ոլորտը լիովին վստահել է Վարդան Հարությունյանին:

Անի Սահակյան