Հացառատցիները շուքով նշեցին իրենց բնակավայրի հիմնադրման օրվա տոնը

Գեղարքունիքի մարզի Գավառ քաղաքի Հացառատ թաղամասի բնակիչները «Հացառատի զարգացման բարեգործական հիմնադրամ»-ի նախաձեռնությամբ շուքով նշեցին իրենց բնակավայրի հիմնադրման օրվան նվիրված տոնը:

«Արմենպրես»-ի տեղեկացմամբ՝ տոնին, որպես պատվավոր հյուրեր, մասնակցում էին Գեղարքունիքի մարզպետի տեղակալ Անդրանիկ Հակոբյանը, ՀՀ Աժ պատգամավոր Ռուբիկ Հակոբյանը, ՀՀ Ազգային արխիվի տնօրեն Ամատունի Վիրաբյանը, Երեւանի Խ. Աբովյանի անվան մանկավարժական համալսարանի դասախոս, բանասիրական գիտությունների դոկտոր Լալիկ Խաչատրյանը, ովքեր հանդես եկան շնորհավորանքի եւ ողջույնի խոսքերով: Ընթերցվեց նաեւ Գեղարքունիքի մարզպետ Ռաֆիկ Գրիգորյանի շնորհավորանքի խոսքը: Տոնի առթիվ Տերունական աղոթք հնչեցրեց Հայ Առաքելական եկեղեցու Գեղարքունյաց թեմի առաջնորդական տեղապահ Կիրակոս վարդապետ Դավթյանը:

Տոնի մասնակիցները եւ պատվավոր հյուրերը ծաղիկներ եւ ծաղկեպսակներ խոնարհեցին Արցախյան ազատամարտում եւ Հայաստանի Հանրապետության սահմանները պաշտպանելիս զոհված հացառատցիների հիշատակը հավերժացնող հուշակոթողին: Տոնակատարությունն ընթանում էր տեղի ինքնագործ խմբերի շնորհալի երեխաների գեղարվեստական կատարումներով:

ՀՀ Ազգային արխիվից բերվել էին Հացառատի պատմության եւ հիմնադրման հետ առնչվող փաստաթղթեր, որոնք տոնակատարության մասնակիցների համար ցուցադրվեցին հատուկ պաստառների վրա: Համաձայն այդ փաստաթղթերի՝ Հացառատ բնակավայրը հիմնադրվել է 1830 թվականին, Արեւմտյան Հայաստանի Բայազետ Գավառից գաղթած եւ Սեւանա լճի ափին հաստատված մի քանի տասնյակ ընտանիքների կողմից: Բնակավայրը, մինչ գաղթականների գալը եւ հետագա տարիներին, մինչեւ 1946 թվականը կրել է Փաշաքյանդ օտարահունչ անունը:

«Այդ մի քանի տասնյակ ընտանիքներն այսօր դարձել են հազարավորներ, որոնց զավակները մեծ ներդրում են ունեցել մեր հայրենիքի կառուցման ու պաշտպանման գործում: Այսօր էլ բազմահազարանոց Հացառատը շարունակում է իր հայրենաշեն ու հայրենապաշտպան առաքելությունը»,-իր խոսքում նշեց Գեղարքունիքի մարզպետի տեղակալ Անդրանիկ Հակոբյանը:

«Հացառատի զարգացման բարեգործական հիմնադրամ»-ի կողմից բնակավայրի մանկահասակ երեխաների համար կազմակերպվել էին հետաքրքիր ցուցադրություններ եւ ժամանցային ու զարգացնող խաղեր:

«Հացառատի զարգացման բարեգործական հիմնադրամ»-ը դրամով, շնորհակալագրերով ու պատվոգրերով պարգեւատրեց հացառատցի աչքի ընկած ուսուցիչներին, աշակերտներին, ուսումնական հաստատությունների տնօրեններին, մարզիչներին, բարերարներին»: Պատվոգիր եւ դրամական պարգեւ ստացավ հանրապետական առարկայական օլիմպիադայում աչքի ընկած մեր դպրոցի աշակերտ Նարինե Մանուկյանը եւ այն ուսուցիչները, ովքեր ներդրում ունեն այդ հաջողության մեջ: Պատվոգրերով եւ դրամով ենք պարգեւատրել նաեւ մեր երկու դպրոցների ուսուցիչներին, «Լավագույն մարզական ընտ անիք» մրցույթի հանրապետական փուլում Հացառատից աչքի ընկած մարզական 5 ընտանիքների ներկայացուցիչներին, նրանց եւ թիվ 7 մանկապարտեզի մարզիչներին՝ թվով 16 հոգու:

Պատվոգիր ու դրամ ստացողների թվում են նաեւ Ապրիլյան քառօրյա մարտերում Հացառատից աչքի ընկած զինծառայող Արման Ավետիսյանը եւ նրա մայրը: Շնորհակալագրով պարգեւատրվել են Հացառատի տարվա լավագույն բարերարներ ճանաչված Կարեն եւ Գարիկ Հակոբյան եղբայրները, Հացառատի լավագույն բարեկամ ճանաչված ՀՀ Ազգային արխիվի տնօրենի տեղակալ Սոնյա Միրզոյանը, Գավառի թիվ 2 դպրոցի տնօրեն Անահիտ Հակոբյանը եւ Գավառի թիվ 8 դպրոցի տնօրեն Վլադիմիր Սարգսյանը»,-ներկայացրեց «Հացառատի զարգացման բարեգործական հիմնադրամ»-ի փոխտնօրեն Արազ Սարիբեկյանը:

Տոնակատարության երկրորդ հատվածում միջոցառման մասնակիցներին գեղագիտական հաճելի պահեր պարգեւեցին «Սասուն» երգի-պարի ազգագրական համույթը եւ մայրաքաղաքից հրավիրված անվանի երգիչներ: Տոնակատարությունն ավարտվեց երեկոյան հրավառությամբ:

Խոսրով Խլղաթյան