Պրահայի հայ գրքարվեստին ցուցահանդեսում ներկայացված են 75 նմուշներ

Գիտություն և Մշակույթ 13 Հոկտեմբեր, 2016 21:32

Պրահայի Ազգային գրադարանի հանրահայտ «Կլեմենտինում» ցուցասրահում հոկտեմբերի 11-ին մեկնարկեց ՀՀ անկախության 25-ամյակին նվիրված «Որք զծորանս Հոգւոյն արբին. Հայ գրքարվեստը դարերի ընթացքում» խորագիրը կրող ցուցահանդեսը, որի կազմակերպիչներն են Հայաստանի և Չեխիայի Ազգային գրադարանները, ՀՀ մշակույթի նախարարությունը և Չեխիայում ՀՀ դեսպանությունը: Միջոցառումը համընկել է նաև Ամստերդամում հրատարակված առաջին տպագիր Աստվածաշնչի 350-ամյակի հետ: Այս մասին Ինչպես տեղեկացնում են ՀՀ արտաքին գործերի նախարարության մամուլի, տեղեկատվության և հասարակայնության հետ կապի վարչությունից՝ հավելելով. «Ցուցահանդեսի բացմանը ողջույնի խոսքով հանդես եկավ Չեխիայի Ազգային գրադարանի գլխավոր տնօրեն Պետր Կրոուպան, ով, անդրադառնալով հայ-չեխական գրական կապերին, առանձնահատուկ կարևորեց նմանօրինակ միջոցառումների կազմակերպումը՝ չեխ լսարանին հայ գրքարվեստին ծանոթացնելու առումով: Այնուհետև Հայաստանի Ազգային գրադարանի տնօրեն Տիգրան Զարգարյանն անդրադարձավ հայ գրի և գրականության պատմությանը, հայապահպանության գործում ունեցած կարևոր դերակատարությանը, ինչպես նաև ցուցահանդեսին ներկայացված բացառիկ նմուշներին:

Չեխիայում ՀՀ դեսպան Տիգրան Սեյրանյանը մեծ գոհունակությամբ նշեց, որ երկու գրադարանների միջև համագործակցությունը և ներկա ցուցահանդեսը կարելի է օրինակելի համարել հայ-չեխական մշակութային համագործակցության պատմության մեջ:

Կարլի համալսարանի նվագախմբի և երգչախմբի ղեկավար, դասախոս, Հայ Առաքելական եկեղեցու ավագ սարկավագ Հայկ Ութիջյանն իր խոսքում ընդգծեց ցուցահանդեսին ներկայացված 75 նմուշների շարքում առանձնահատուկ տեղ զբաղեցնող Սուրբ Գրիգոր Նարեկացու աշխատությունները, 1513թ.-ի «Պատարագատետր»-ը, 1664թ.-ի «Շարակնոց»-ը, 1666թ.-ին Ամստերդամում տպագրված Աստվածաշունչն ու չեխ հեղինակների հայերեն թարգմանված գործերը, որոնց մեջ առանձնահատուկ արժեք ունի Յարոսլավ Հաշեկի' «Քաջարի զինվոր Շվեյկի արկածները» վեպը:

Ցուցահանդեսի բացմանը ներկա էին Չեխիայի պետական ատյանների, նախագահական գրասենյակի բարձրաստիճան պաշտոնյաներ, ավելի քան 20 երկրների դեսպաններ, մշակույթի և գրականության գործիչներ, հայ համայնքի ներկայացուցիչներ:
Ցուցադրությանը զուգահեռ ընթանալու են դասախոսություններ՝ Սուրբ Գրիգոր Նարեկացու, հայկական եկեղեցական երաժշտության և Հայոց ցեղասպանության վերաբերյալ:

Ցուցահանդեսը կեզրափակվի հոկտեմբերի 25-ին «Կլեմենտինում»-ի հայլեպատ մատուռում' խմբավար Հայկ Ութիջյանի ղեկավարած Կարլի համալսարանի լարային նվագախմբի համերգով»: