Դմիտրի Մեդվեդևը՝ «եդինոռոս»

Այսօր ՌԴ վարչապես Դմիտրի Մեդվեդևին հանդիսավոր կերպով հանձնել են «Միասնական Ռուսաստան» (Единая Россия) կուսակցության անդամության տոմսը, հաղորդում է РИА Новости-ն։ Հանձնման արարողությունը տեղի է ունեցել «Կոմպաս» ընկերության հավաքի ընթացքում։

Մայիսի 21-ին Մեդվեդևը դիմում էր ներկայացրել՝ ընդունվելու կուսակցության շարքերը ըստ բնակության վայրի։ Ըստ կուսակցության կանոնագրքի՝ թեկնածուն պետք է կես տարուց ոչ պակաս լինի կազմակերպության պաշտոնական կողմնակից։ Կառավարության ղեկավարին, սակայն, բացառություն են արել, հաշվելով նրա մասնակցությունը 2011 թվականի նախընտրական արշավին, երբ նա գլխավորում էր եդինոռոսերի խորհրդարանական ցուցակը։

Մայիսի 26-ին Մոսկվայում տեղի է ունենալու կուսակցության համագումարը, որում Պուտինի փոխարեն կընտրվի կազմակերպության նոր նախագահ։ Նրան որպես իր հաջորդի երաշխավորել է ինքը՝ Պուտինը։

Մեդվեդևի կարծիքով, եդինոռոսերը պիտի կենտրոնամետ և պահպանողական դիրքորոշում պահպանեն, մոդեռնիզացնելով, սակայն, կազմակերպությունը՝ հաշվի առնելով խորհրդարանական ընտրությունների արդյունքները, որի արդյունքում կուսակցությունը Պետդումայում չի կազմել սահմանադրական մեծամասնություն։ 

Սպասվում է, որ մայիսի վերջին կուսակցություն կընդունվի ևս մի քանի քաղաքական գործիչ և պաշտոնյա։