Պայքար հայկական գամփռի և Վանա կատվի համար

ՀՀ կինոլոգիական-մարզական միությունը պայքարում է միջազգային հանրությանը ներկայացնելու համար գամփռը՝ որպես շան հայկական ցեղատեսակ, և Վանա կատուն՝ որպես կատվի հայկական ցեղատեսակ։

Ինչպես հայտնեց միության նախագահ Վիոլետա Գաբրիելյանը, իրենք Միջազգային կինոլոգիական միությանը ներկայացրել են զեկույցներ և փաստաթղթեր, որոնց հիման վրա ցանկանում են հայկական հովվաշանը գրանցել որպես ազգային ցեղատեսակ։

Նա ասաց, որ թուրքերն ու ադրբեջանցիները մեծ գումարներ են ծախսում` ապացուցելու համար, որ իրենք էլ ազգային ցեղատեսակներ ունեն։ Թուրքերը, որպես այդպիսին, գրանցել են անատոլիական կարաբաշը, որը նույն հայկական գամփռն է։ Բայց, քանի որ տարբեր բնակլիմայական պայմանները որոշակի փոփոխությունների են ենթարկում կենդանիներին, տիկին Վիոլետան, դրանց վրա հիմնվելով, հույս ունի գամփռը գրանցել որպես հայկական ցեղատեսակ։ «Գամփռը Հայկական լեռնաշխարհում տարածված շուն է և արհեստական խաչասերումներով չի ստացվել։ Մենք դա պիտի բոլորին ապացուցենք»,- ասաց Վիոլետան։

Ըստ նրա՝ գամփռի վերաբերյալ բոլոր ելույթների ժամանակ իրենք խոսել են նաև Վանա կատվի և նրա հայկական պատկանելության մասին։ Միության անդամ, անասնաբույժ Կարո Պետրոսյանը, ով լրագրողների հետ հանդիպմանը բերել էր իր քառասուն օրական գամփռին՝ Ռուշին, ասաց, որ Թուրքիայում խաբում են զբոսաշրջիկներին. «Այնտեղ Վանա կատվի անվան տակ վաճառում են հասարակ անգորական կատու, իսկ իսկական Վանա կատուն խիստ պահպանվում է, և չի թույլատրվում այն երկրից դուրս բերել»։

Ասուլիսին ներկա էր ևս մեկ գամփռ՝ մոտ մեկուկես տարեկան Վուլկանը։ Նրա տերը՝ Վաղարշը, Հայաստանում ամենաշատ գամփռներ ունեցողներից է։ Նա պատմեց, որ գամփռը շատ խելացի, հանգիստ ու հավասարակշռված կենդանի է, նվիրվող է և պաշտպանում է իրենից թույլերին։ Չափազանց ուժեղ է և ամրակազմ, քանի որ նրա բնական «առաքելությունը» հոտը պաշտպանելն ու գայլերի հետ կռիվ տալն է, ինչի համար պետք են համապատասխան ֆիզիկական հատկանիշներ։