Պատգամավորի կարծիքով՝ ոչ մեկի չեն վիրավորի, եթե ապրիլի 2-ին ընտրություններն անցկացվեն

«Հոգևոր Հայաստան» նախաձեռնող խումբը բաց ուղերձ էր հղել ՀՀ իշխանություններին, ՀՀ կուսակցություններին, համայն հայությանը՝ պահանջելով անհապաղ տեղափոխել ընտրությունների օրը, քանի որ նախորդ տարի այդ օրերին տեղի ունեցավ Ապրիլյան պատերազմը և դեռ թարմ են թշնամու հասցրած վերքերը:

«Սրա մեջ որևէ քաղաքական խնդիր չկա, որ այսպիսի հնչեղություն է ստացել»,- ԼՈւՐԵՐ.com-ի թղթակիցի հետ զրույցում նման տեսակետ հայտնեց ԱԺ ՀՀԿ խմբակցության պատգամավոր Լեռնիկ Ալեքսանյանը:

Մեր զրուցակիցը նամակին վատ չի վերաբերում՝ նշելով՝ «մտահոգություն կա, ինչ խոսք»: Պատգամավորն առաջարկում է քննարկել խնդիրը՝ հաշվի առնելով պլյուսներն ու մինուսները. «Եթե նայենք մեկ այլ կողմից, ամբողջ ապրիլ ամիսն է անհարմար՝ կապված ցեղասպանության տարեդարձի հետ: Այդ օրվա հետ կապված՝ մարդկանց մտահոգությունը տեղին է, բայց կան նաև աշխատանքային պրոցեսներ, որոնք հնարավոր է՝ տուժեն օրը փոխելով»:

Լեռնիկ Ալեքսանյանի կարծիքով՝ խորհրդարանական ընտրություններն ապրիլի 2-ին նշանակելը սահմանադրական խախտում չէ: Պարզապես, առաջին հայացքից է թվում, թե սահմանադրական խախտում կա, բայց մասնագետներն ավելի լավ գիտեն: Խորհրդարանական ընտրությունների օրն ընտրված է օրենքով և նա չի կարծում, որ այն հակասում է սահմանադրությանը:

Քանի որ խորհրդարանական ընտրություններին ընդառաջ՝ նախապատրաստական մեծ աշխատանքներ են իրականացվում, պատգամավորի խոսքով՝ պետք է հաշվի առնել մինուսներն ու պլյուսները, քանի որ շատ կտուժեն կատարված աշխատանքները:

«Օրը փոխելն այդքան էլ հեշտ չէ, որ միանգամից վերցնեն և օրը փոխեն: Ընտրությունների օրը տոն չէ, այլ գործնական օր է և դրանով մենք չենք վիրավորի ոչ մեկի, սակայն հարգանքով եմ վերաբերում այս խնդրին»,- եզրափակեց Լեռնիկ Ալեքսանյանը:

«Հոգևոր Հայաստան» նախաձեռնող խմբի անդամների (Հասմիկ Պապյան (օպերային երգչուհի), ՀՀ ժողովրդական արտիստ Խաչիկ Չալիկյան (ռեժիսոր, դրամատուրգ), Եղիշե Պետրոսյան (երգահան, երաժիշտ), Ռուբեն Կարապետյան (պատմական գիտությունների դոկտոր), ՀՀ դեսպան Վարդան Խաչատրյան (պատմաբան), ԵՊՀ դասախոս Արեգ Նազարյան («Ոստան Հայոց» ռոք խմբի հիմնադիր), «Կիլիկիա» նավի նավապետի ավագ օգնական Արթուր Սարգսյան («Հաց բերող»)) բաց ուղերձում մասնավորապես ասվում է.

«Հարգելի հայրենակիցներ, 2016թ. ապրիլի 1-ից 4-ը տեղի ունեցած քառօրյա պատերազմը հրաշեկ լիցքով անցավ ամեն հայի սրտով: Պատերազմը փաստեց նոր իրողություններ, որոնք մեզ ստիպեցին վերագնահատել վերջին 20 տարում ձևավորված բազում համոզմունքներ: Այդ օրերին մենք տեսանք, թե ինչպես դրսևորվեցին երիտասարդ հայ սերնդի բացաառիկ ոգեղեն հատկանիշները, ու երևաց հայրենիքի հանդեպ՝ աշխարհասփյուռ հայ ժողովրդի սիրո միահամուռ ալիքը: Նշենք, որ ռազմական գործողությունները անսգող ուրվագծեցին նաև այն հանցանքներն ու թերացումները, որոնց պատճառով մենք ունեցանք պայծառ հայորդիների անդառնալի կորուստներ: Զոհված հայ հերոսների վիշտը սգաց համայն ազգը և այն թողեց մոխրացած կետ ամեն հայի սրտում: Այս տարի ապրիլ ամսի սկզբին տարելիցն է մեր կյանքի այդ դրամատիկ ջրբաժանի, սակայն պարզվում է, որ ապրիլի 2-ին նշանակված են ԱԺ համապետական ընտրություններ: Փաստորեն, պետական ինստիտուտի որոշումը կարող է վարագուրել հազարավոր անձնուրաց հայրենասերների հերոսությունը, քանի որ արդեն տասնամյակներ շարունակ ընտրական գործընթացները մեզանում վերը նշված ողջ դրականի ուղղակի հակադրությունն են և բացասականի գերխտացումը: Ժողովրդի հիշողության մեջ դրանք նույնանում են արդարացիության խախտման, ազգի ոգեղեն էությունը կոտրելու, միասնականությունը բզկտելու և իրար առճակատելու արատավոր երևույթների հետ: Դա մեր խորին համոզմամբ՝ արհամարհական վերաբերմունք է մեր սուրբ նահատակների հիշատակի հանդեպ: Վերը բերվածից ելնելով՝ Հոգևոր Հայաստանը պահանջում է անհապաղ տեղափոխել ընտրությունների օրը այնպես, որ որևէ կերպ այդ ժամկետը չնույնականանա քառօրյա պատերազմի հետ:

Սոնա Հարությունյան